Home Gobierno 80% di e poblacion di Aruba tin sobrepeso y di dje 30%...

80% di e poblacion di Aruba tin sobrepeso y di dje 30% ta obeso

237
0
SHARE
- Advertisement -

Minister Dangui Oduber:

Lo bin cu campaña fuerte di concientizacion

ORANJESTAD (AAN) – Minister di Turismo, Salud y Deporte, Dangui Oduber, den conferencia di prensa di Diahuebs, den e contexto di e Plan Nacional di Prevencion di Salud, cu lo wordo implementa na 2020, a ilustra cu e siguiente datonan, con serio e situacion na Aruba ta y con e ta afecta e fondo di AZV.

Cifranan cu e mandatario a menciona ta revela cu 80% di e poblacion di Aruba tin sobrepeso. Di e 80% aki, e 30% ta obeso. Gastonan pa pacientnan cu ta haya dialisis ta 20 miyon florin anualmente.

Dialisis ta e tratamento cu e personanan cu deficiencia renal grave tin cu uza. Esaki ta un malesa cronico mescos cu personanan cu ta sufri di Diabetes, cu tin un nivel basta halto di sucu den sanger.

Diabetes ta empeora ora e pacient ta consumi sucu den exceso. E mandatario a subraya cu pa medio di un campaña agresivo di concientizacion y informacion pa comunidad, pero tambe pa medio di e Oficinanan di MFA, lo duna chekeo genera gratis na e comunidad pa check presion, sucu, colesterol, trigliserido, pa asina aki haya informacion di con e estado di salud di nos comunidad ta, pa poco poco, e ciudadano cambia su manera di  pensa, di come, di biba y haci ehercicio pa tin un poblacion mas saludable y asina por garantiza e sostenibilidad di e fondo di AZV.

E dignatario a agrega cu hopi pais den Caribe tin problema cu salud na e momentonan aki. No ta Aruba so tin e retonan aki. Minister di Salud a señala cu tin un crisis di salud den Caribe, y hopi pais a pronostica caba cu si no cambia e estilo di biba pa un sistema mas saludable, hopi di nan lo no por carga e peso aki, y mas door di e problema di obesidad.

El a reitera cu e programa “hoben activo hoben feliz” ta fit den esaki pasobra intencion ta pa inculca den e mucha for di scol preparatorio caba, pa nan participa activamente den deporte, y e proyecto aki a resulta di ta exitoso y pesey e lo wordo amplia na 2020 pa den tur distrito y bario, tin e programa aki tambe.

- Advertisement -

DUNA COMENTARIO

Please enter your comment!
Please enter your name here