Asunto di Ley di Serlimar
ORANJESTAD (AAN); Wowo di henter e pais tabata Dialuna dirigi riba Parlamento. Pero e reunion a wordo para.
Den un entrevista cu Presidente di Parlamento Ady Thijsen, el a splica di con a para e tratamento di e Ley di Serlimar.
Segun Thijsen a tuma e decision aki, y a mustra cu tabatin algun documento cu a yega laat pa e reunion. E ora e como Presidente di Parlamento a tuma e decision pa pospone e reunion di Dialuna mainta.
Awor e reunion lo sigui riba Diaranzon 2 di October 2019 den oranan di mainta.
E asunto di Serlimar aki ta algo andando di hopi tempo caba. Si un Parlamentario ta trahando riba e caso, ya e tin hopi informacion riba e ley aki. Kizas a bin informacion nobo, pasobra e Ministro mester a contesta. Si acaso e Ministro no a contesta tur, kizas e ta warda te ora di e reunion di Parlamento pa duna contesta.
Pues e Parlamentario tin herment pa por haci su trabao.
Ady Thijsen a mustra cu tur Parlamentario tin su velocidad di traha. E mes como Presidente di Parlamento, tin habilidad pa lesa y compronde documentonan hopi rapido mes, y e sa cu no ta tur Parlamentario por haci esey. Thijsen tin e suerte cu e ta un hurista cu por compronde mas rapido.
Pues no ta tur hende por prepara mesun sistema, y algun Parlamentario por haci uso di conseho tambe. Pues tin di duna tur hende e oportunidad pa nan ta bon prepara pa reunion. Aunke Thijsen ta mustra cu un Parlamentario mester ta semper 24/7 “ready” pa por traha y move riba cierto asunto cu tin di wordo trata.
Esey ta e forma con Constitucion ta hinca den otro. Gobierno tin su Ministronan y cada uno tin su maneho. Cada uno ta bin cu nan proposicionnan pa bin cu ley of haci cambio. Tin Parlamento cu ta controla y finalmente aproba. Cada uno tin di respeta otro y tuma decision.
Den e Reunion Publico, lo bay atende tambe e Manifiesto di tanto trahadornan di Serlimar, y e Manifiesto di e trahadornan di MetaCorp. Ady Thijsen a mustra cu aworaki e isla aki no mester di intrankilidad, y tin di compronde cu ta trata di e clase trahador. Hendenan cu tin nan famia pa cria y nan ta den incertidumbre. Pesey Parlamentarionan tin di atende e asunto, tene cuenta cu tur hende, y tuma decision.
“Pesey bo a wordo escogi pa traha como Parlamentario,” Ady Thijsen a bisa. “E Parlamentario mester asumi su responsabilidad, si e ta pro of contra, of e ta abstene, toch e mester tuma decision.”
Un biaha mas e presidente di Parlamento a papia di e personanan cu e dianan aki ta ocupa cu instiga, manipula, insulta, y menaza. E ta kere cu e personanan ey no ta stima nan pais. E “bottom line” ta cu Parlamento tin di tuma decision awor y den futuro pa asina pone e pais bek manera cu e mester ta. E ta pidi tur hende pa coopera, laga Parlamentarionan haci nan trabao, y ta pidi comprension di comunidad y tur actornan. Ady Thijsen ta opina cu nan como Parlamentario ta haciendo un bon trabao.
E sa cu Ministro tin su opinion y pensamento, y Parlamentarionan tin nan pensamento. Tin biaha e pensamento ta riba mesun linea cu Ministro, tin biaha e ta full diferente, pero hecho ta cu tin di respeta otro y laga e proceso democratico cana y warda riba decision final.
