Home Economia Ainda Aruba  no ta tumando suficiente medida pa logra mehoramento sostenible di...

Ainda Aruba  no ta tumando suficiente medida pa logra mehoramento sostenible di finanzas publico

161
0
SHARE
- Advertisement -

CAft a mustra cu:

ORANJESTAD (AAN): Diabierna durante un conferencia di prensa di Colegio di supervision financiero CAft, Raymond Gradus, presidente di CAft a cuminza cu e parti cu tabata bon noticia, esta cu e ta contento di wak cu e pilar economico number 1 di Aruba, esta Turismo, ta sigui fuerte.

El a indica cu a pesar cu Aruba a perde e turistanan di Venezuela, e hecho cu mas turista Mericano y Europeo ta bishita Aruba ta compensa pa esaki.

Gradus despues a papia riba e situacion financiero di Aruba.

El a indica cu  te ainda no tin suficiente bista riba un mehoramento sostenible di finanzas publico di Aruba. A base di e di dos reportahe di ehecucion Colegio di supervision financiero di Aruba (CAft) ta spera cu lo alcansa e norma di deficit acorda pa aña presupuestario 2019, pero ta trata di mas cu esey: den e protocol di cooperacion entre Aruba y Hulanda a stipula explicitamente cu tambe e gastonan y entradanan subyacente mester contribui na sostenibilidad di finanzas publico. Asina, por ehempel, e gastonan di personal mester keda denter di e norma acorda di 479 miyon florin.

Conseho pa duna instruccion

Dia 23 di september 2019, a base di e Ordenanza Nacional tocante Supervision Financiero Temporal di Aruba (LAft), como parti final di un trayecto extenso di scucha otro bilateralmente, CAft a manda Conseho di Ministro di Reino un conseho pa duna Aruba un instruccion.

A constata cu Pais Aruba no ta tumando suficiente medida pa logra mehoramento sostenible di finanzaspublico. Den esaki ta esencial pa aplica e norma di gasto di personal stipula den e protocol di cooperacion Aruba – Hulanda 2019 – 2021 di dia 22 di november 2018 y pa pone den practica e reforma fiscal. Dependencia di entrada incidental ta demasiado grandi, locual ta trece riesgo cu ne.

Gradus a bisa tambe cu referente na e bahamento di gasto di personal cu tin premira, e protocol entre Aruba y Hulanda ta stipula cu e gastonan di personal -incluyendo e contribucionnan di e dunadonan di trabou- lo por monta te maximal 479 miyon florin na 2019.

En bista cu e gastonan di personal di e Fondo Presupuestario Provisional pa e Plan di Crisis Social (IBSCP) ta cay bou di e norma di gasto di personal aki, lo mester economisa adicionalmente na 2019 pa por cumpli cu e norma. Conseho di Ministro di Reino lo dicidi tocante e asunto aki.

Recientemente CAft a realiza, den consulta cu Gobierno, un analisis di e gastonan di overtime den e servicionan publico unda overtime ta mas comun. A entrega Gobierno e resultadonan di e analisis aki. CAft ta spera cu e conclusionnan y recomendacionnan lo ta di ayudo pa determina con pa deal cu e gastonan di personal demasiado halto.

Reforma fiscal

Cuminsamento di e aña aki a inicia un reforma fiscal den cual ta modifica y, na unda ta posibel, ta simplifica e sistema di recargo y impuesto. Te aworaki a pone den practica solamente un parti di e plan di reforma fiscal, door di cual ta existi e riesgo cu lo no realiza suficientemente e entradanan incremental di mas aña previsto.

Presupuesto 2019 y 2020

Den su reaccion riba e di dos reportahe di ehecucion di 2019 CAft a indica cu e ta spera cu e saldo di financiacion di e sector colectivo na fin di aña lo keda denter di e norma di deficit acorda di 0,5 porciento di e PIB. CAft ta pidi pa sigui presta atencion na desaroyo di e resultado financiero di Seguro Medico General (AZV) y Gobierno a compromete su mes pa haci un analisis.

No a entrega e proyecto di presupuesto di 2020, mientras cu Constitucion di Aruba ta stipula cu e mester ta entrega na Parlamento pa mas tarda dia 1e. di september. Na 2020 e saldo di financiacion mester mehora cu aproximadamente 50 miyon florin, compara cu e pronostico actual di e resultado pa 2019.

Ademas, como consecuencia di e aumento di gasto (22 miyon florin) y di e crecemento autonomo di e gastonan di personal (10 miyon florin), reahustacion adicional lo ta necesario pa alcansa e norma di surplus na 2020.

E bishita di Caft tabata riba 24 y 25 di October, unda cu a tene  combersacion cu, entre otro, Gobernador, Ministro di Finanzas, Asunto Economico y Cultura, Conseho di Ministro y e Comision di Finanzas, Asunto Economico y Organisacion Gubernamental di Parlamento. Ademas, CAft a haci bishita na Autoridad di Turismo di Aruba (ATA), Organo Ehecutivo di Seguro Medico General (UOAZV) y Servicio di Impuesto.

- Advertisement -

DUNA COMENTARIO

Please enter your comment!
Please enter your name here