Home General AVP a abusa di representacion di Pueblo

AVP a abusa di representacion di Pueblo

177
0
SHARE
- Advertisement -

Analisis

Lider di oposicion Marlon Sneek mester enfrenta pueblo den caso Tjon

Na e momentonan aki e sistema democratico di Aruba ta na peliger. Durante e siman cu a termina, e fraccion di AVP den Parlamento a uni su mes cu e lider di nan partido cu ta nenga di ta parti di Parlamento, pa ataca Ministerio Publico.

E motibo cu a bay contra Ministerio Publico tabata un investigacion di posibel kiebra di leynan di Aruba y actonan castigabel cu tereno di e pais cu lo a wordo uza pa compra y benta personal.

E hecho cu dos miembro di Parlamento a pidi e investigacion, no ta contra ley. Segun ley miembronan di Parlamento mester investiga tur loke ta contra interes di Aruba.  Ministerio Publico mester ta capaz si dicidi si e ta investiga y el a dicidi cu e ta investiga.

E hecho aki tabata motibo pa fraccion di AVP a uni cu e lider di AVP, Mike Eman, cu no kier drenta Parlamento, pa lansa atake directo contra Ministerio Publico pero tambe menasa directo contra contrincantenan politico.

E menasanan di lider di AVP, Mike Eman, no ta cuadra cu e estado di derecho cu Aruba ta, pasobra ley ta exigi Eman di entrega caso contra tur persona, cu segun prueba a trapa riba ley na autoridad.

E caso no a termina cu e discurso di Mike Eman, pero a haya un rabo ora un miembro di fraccion di AVP a bay dilanti pa bolbe uza un caso civil y acusacionnan pa cual e no a presenta prueba contra e miembro di coalicion Rocco Tjon. Ta trata aki di acusacionnan hopi serio cu den un caso penal lo ta wordo considera sumamente castigabel.

Melvin Tromp no tabata tin ningun prueba den su man ora den su calidad como miembro di Parlamento, el a acerca Aruba pa acusa un persona cu despues a resulta cu Gobierno di AVP mes a yega di nombra den posicion halto pero mas ainda declara liber di tur loke por stroba su nombramento.

Awe Marlon Sneek como lider di oposicion den Parlamento mester splica pueblo con e ta asumi su responsabilidad como lider di e fraccion di AVP pa atende cu loke a pasa.

Mientras fraccion di AVP a wordo uza pa Mike Eman, cu no kier drenta Parlamento, lansa atake y menasa representantenan di nos hala di gobernacion, awe Marlon Sneek mester bini dilanti pa splica Aruba si mester guli cu e forma cu fraccion di AVP, oposicion, a wordo uza door di e miembro di fraccion Melvin Tromp.

Abuso a wordo haci dor di e miembro di fraccion di AVP, Melvin Tromp, cu mester a permiti pa representacion di pueblo a wordo uza pa e lanta un acusacion sumamente serio mientras e mes a permiti AVP di nombra Rocco Tjong den posicion halto.

Palabra ta na Marlon Sneek kende, mescos cu Melvin Tromp, a hura dilanti Dios, di lo mantene su mes na e interes di Aruba y di sirbi cu dignidad e tarea di representante di pueblo! Mike Eman, a pesar di 7 Mil voto a nenga di presta huramento pa bira miembro di Parlamento, pero tanto Marlon Sneek y Melvin Tromp, a hura cu nan lo respeta Aruba.

Palabra a caba den e caso tristo aki cu ta afecta e nivel di representacion di pueblo seriamente.

- Advertisement -

DUNA COMENTARIO

Please enter your comment!
Please enter your name here