Hopi hende yamando DIARIO:
ORANJESTAD (AAN) – Matutino DIARIO a ricibi varios keho di aseguradonan di AZV, cu ta sufri di incontinencia y mester bisti bruki.
Cu masha disgusto y indignacion, nan ta reclama cu AZV a baha e cantidad di bruki cu pa nan ta di uso indispensable. AZV ta sigui baha y cremencha e pakete di servicionan pa comunidad, cu ta semper esun cu mester paga pa tur cos.
E necesidad aki no ta solamente di hende di edad grandi, pero di hopi mas asegurado cu pa diferente causa, tin e problema aki, y aunke no tur tin mester di un operacion, no obstante bisti bruki ta crucial pa nan confort diario, como ser humano cu tin derecho na un mihor calidad di bida y cu ta paga pa AZV.
Logicamente, entre e personanan cu ta ricibi bruki di AZV tin varios pensionado, cu ta masha disgusta mes pasobra nan mes ta cubri nan prima di aseguro medico y nan ta paga un dineral tur luna. Nan ta pagando mas cu 18% di nan pension, cu ta nan entrada siendo cu tempo nan tabata activo den e mercado laboral y cu tabata haya un salario tabata paga e tarifa normal; kiermen, e porcentahe cu ta wordo desconta pa Belastingdienst na tur trahador. Pero un bez nan a baha cu pension e tarifa a triplifica y nan entrada a bira menos, hasta si nan haya pension di empleado publico y un tiki acerca di pension di AOV, cu nan a paga pe.
Y personanan cu a yega edad di pension pero cu mester sigui traha tanten cu e doño di trabao no retira nan, ta sigui paga AZV y plus pa un pension chikito di AOV, tur aña ta ricibi cobranza di belasting cu nan debe 500 of mas placa di AZV. Algo cu nan no ta compronde, y cu ningun hende por splica nan. E ultimo dos lunanan nan ta hayando e cobranzanan atrasa un tras di otro, for di cinco aña pasa, y hopi mester bay Belasting pa yega na un areglo di pago, pasobra di un tiro nan no por pague.
AZV cada bez ta aporta menos na e asegurado. Pero nan ta haya sumanan hopi cuantioso, y nan empleadonan no ta gana un salario minimo ni mucho menos, pero balente placa nan ricibi pa luna.
Tin asegurado cu ta sinti cu AZV no ta trata tur nan clientenan igual. Nan ta manda afo pa ayudo medico, esnan cu nan kier, y esnan cu nan no kier maske cuanto e pacient mester, no ta bin na remarca pa bay den exterior.
Ya caba nan a cremencha hopi den e remedinan. Casi ningun remedi ta original mas, pero generico mas tanto ta loke e docternan por receta y generico toch no ta bay cu tur hende y no ta mes efectivo cu esun original.
Straño cu tanto cos cu AZV ta kita y kita y ainda nan ta keha cu no tin suficiente fondo. E aseguradonan no ta compronde esaki.
Awor nan a baha e cantidad di bruki pa cada pacient cu mester, mañan ta Dios so sa ki servicionan mas AZV lo merma pa comunidad.
