BBO den prijs total ta keda problema

    172
    0
    SHARE
    - Advertisement -

    Hopi comerciante no por comprende e insistencia di Ministro di Financia 

    *Companianan mester mantene administracion di entrada gobierno

    *Comercio no ta gobierno cu por hiba maneho financiero di debe

    ORANJESTAD  (AAN) —  Pakico e insistencia pa BBO ta parti di e prijs cu comerciantenan ta presenta na publico? E pregunta aki ta keda sin contesta cerca hopi comerciante cu ta mustra riba e peso administrativo pa comercio cu ta pasa den uno di su pio momentonan.

    Comerciantenan cu ta acerca DIARIO ta mustra riba e administracion enorme cu companianan  mester mantene pa percura pa gobierno cobra su belasting y primanan , cu ta su entrada.

    Manera a wordo indica, den transcurso di tempo comercio mas y mas a wordo encarga cu canalisacion di entrada di gobierno na belasting y prima cu ta wordo kita for di e miembro di personal. Por bisa cu comercio mester percura pa e trahado paga loke e debe na gobierno of instancianan di gobierno.

    Esaki ta haci cu e administracion di e comerciante ta mas exigente pa por cumpli cu gobierno, cu no ta tene cuenta cu e situacionnan comercial.

    “E crisis cu Aruba ta aden ta afecta e comerciante cu ta biba di benta na su clientela. Gobierno ta tuma medida pisa pa exigi pago di tur loke e mester haya pa deshaci di fayonan den e forma cu a maneha fondonan di Aruba. Awe pueblo mester paga pero den varios caso e pago mester tuma luga pa medio di comercio, cu mester ahusta su administracion na loke gobierno ta dicidi,” a wordo indica.

    Recibonan ta prueba cu comercio ta porta di pago cu personal mester haci na gobierno.

    Deduccion for di salario di personal mester wordo haci door di comerciantenan cu mester tin un administracion adapta na cada decision di gobierno pero tambe percura pa gobierno haya placa den su caha.

    “Comerciantenan ta mara na tempo pa entrega tur placa cu nan a deduci for di e personal. Faya cu e temponan aki ta nifica boet. Pues riba comerciantenan peso ta cay pa asina gobierno cobra su entradanan,” a wordo splica.

    E debe nacional a mustra e diferencia entre maneho di negoshi y maneho di gobierno.  A keda demostra cu comercio no tin e luho cu gobierno tin pa crea un debe cu lo a pone negoshi bati bankroet.

    “Gobierno mester tene cuenta cu e comerciante y e gastonan pa continuamente adapta administracion na decisionnan gubernamental nobo. Den e cuadro aki gobierno por a mantene e sistema cu tabata tin pa presenta e suma di BBO separa,” a wordo indica.

    Aruba ta drenta un siman sumamente pisa pero mester tene cuenta cu e peso mas grandi ta pa comercio, cu ta base di economia y situacion financiero/social  manera a wordo indica.

    - Advertisement -

    DUNA COMENTARIO

    Please enter your comment!
    Please enter your name here