Home Cultura Biblioteca Nacional ta presenta: “Rescate di memoria pasobra abo tambe ta conta”

Biblioteca Nacional ta presenta: “Rescate di memoria pasobra abo tambe ta conta”

35
0
SHARE
- Advertisement -

Diahuebs 17 di October 6.30 pm:

ORANJESTAD (AAN) — E linguista y gestor Cultural sr. Mirto Lacle, a yama un conferencia di prensa na Biblioteca Nacional na Oranjestad, den cual a elabora tocante e anochi yama “Rescate di memoria pasobra abo tambe ta conta”, cu lo ta diahuebs 17 di October awo, for 6.30 or di atardi na antesala di Biblioteca Nacional, te 10’or di anochi.

Cuater persona hopi destaca na Aruba pa nan talento lo wordo honra, y Mirto Lacle a splica esaki.

Sr. Mirto Lacle a splica cu esaki ta un anochi unda lo duna un retrospeccion ya cu, for di algun aña pasa, a duna siguimento na e bida di sr. Joe (Jose) Dania, cu dia 5 di October ultimo, a cumpli un centenario.

E anochi aki lo presenta un triologia (musica, canto y baile). Esaki ta un parti unda ta bay presenta e bida di sr. Dania como reciclado, unda e ta uza su man cu su creatividad, y lo mustra tambe un cuadro cu el a entrega na Biblioteca Nacional como recuerdo, unda e ta hiba hopi adulto na su momentonan di infancia, cu sr. Lacle ta yama: “Puber eternis”. Lacle a subraya cu den tur adulto tin un mucha: e wega, e cancion di cuna cu ta haci un mucha drumi y cu ta  conta di “dede pikiña, subi siña, fula bolo, mata caraña” y cu ta conoci cu tin variacion di esakinan na Aruba, Corsow y Bonaire, y na paisnan di habla hispano, como tambe pa Portugal y Brasil.

Mirto Lacle a bisa cu e anochi aki tin un elenco cu ta bay des-memoriza bay cien aña atras. Den e cuadro aki fuera di e documental di Joe, el a hiba combersacion cu sr. Frank Williams, un persona masha conoci den e comunidad como educador (maestro) y docente di Ingles, y el a traha algun composicion poetico dedica na dos amigo di dje. E ta presenta tambe imagen filma di un rooi. Lacle a comenta cu tur hende conoce Rooi Taki, pero e ta puntra cual di nos ta conoce Rooi Manonchi?

El referi tambe na e Ruiseñor di Savaneta Ronny Kock y tambe na e pianista Johnny Scharbaai, cu ta investigador tambe ademas cu a cautiva pueblo cu su manera di toca.

Mirto Lacle a subraya cu ta ora pa honra e personanan aki cu a destaca na un forma masha significativo, den loke ta musica, canto y diferente expresion artistico hibando e nomber di Aruba mas aya.

Den nomber di Biblioteca Nacional, Departamento di Cultura y su persona mes, sr. Mirto Lacle kier a trece esaki na conocimento di pueblo, pasobra Diahuebs 17 di October, y tambe den cuadro di e Dia de La Raza of Columbus Day (Dia di Hispanidad e ultimo añanan), pa mustra un perspectiva opuesto of distinto, pa loke ta e parti di e hemisferio aki unda nos ta biba. Ademas pa recorda cu Misa San Francisco a cumpli 100 aña na luna di October, cu tambe a celebra Dia di Mascota.

 

- Advertisement -

DUNA COMENTARIO

Please enter your comment!
Please enter your name here