Home General Blackouts na estado Zulia ta pone habitantenan cana rond manera Zombie

Blackouts na estado Zulia ta pone habitantenan cana rond manera Zombie

291
0
SHARE
- Advertisement -

ORANJESTAD (AAN): Un publicacion e siman aki den ‘Efecto Cocuyo’ na Venezuela, ta mustra cu keto bay region di Zulia ta sigui pasa den e parti mas peor di e crisis di coriente.  Nan a registra un total di 12 blackouts den e ultimo siman di September y comienzo di October.

E tres blackout mas grandi tabata Diaranson 25 di September, Diahuebs 3 di October madruga pa mainta, y e mesun Diahuebs ey en oranan di anochi.

Algun area ta nota cu cada rato coriente ta bay tur dia.  Y e  crisis di coriente aki a pone cu e bida di tur hende na Zulia a cambia drasticamente.  Hopi hende di e estado no ta drumi suficiente, y ta haya cantidad di pica di sangura anochi, y ademas nan ta sin comunicacion.

Como cu no tin coriente, e companianan di telefon por haci nada cu nan Cellsites cu ta sin coriente ni generator.  Pues no por haci yamada ni surf internet cu data.

“Hopi di nan ta parce Zombie ta cana den dia riba e cayanan di e region,” e publicacion a skirbi.

Algun a reacciona bisando cu ya nan no tin smaak di traha mas.  Nan tin soño henter dia, pasobra tur anochi nan ta sin coriente.  “Mi ta drumi pafo, pasobra paden ta haci hopi calor, pero sanguranan ta comemi.  Den dia mi ta cana rond manera Zombie,” ta loke e habitante Migdalia Cepeda a bisa.  E ta docente di bachillerato y ta biba na Bella Vista, na Maracaibo.

E docente a bisa cu e poco oranan cu nan tin coriente na cas, pues ora cu luz bin bek, nan ta dedica esey exclusivamente pa charge nan smartphones pa asina usa nan despues como flashlight, pa mira cuant’or tin, y scucha e emisoranan di radio cu ta den aire.

Pueblo di Zulia cu no tin coriente, no por mira TV tampoco, ni subi Internet, ni scucha musica.  Tampoco nan no por bay cinema, ni un centro comercial, pues e blackoutnan ta afecta tur negoshi.

Anochi nan no por cushina den scuridad, y tin biaha no tin gas tampoco.  Pesey awor mayoria di habitantenan na Maracaibo ta optando pa cumpra cuminda cu ta facil pa prepara of cuminda cu ta cla pa come.

Pues nan ta cumprando hopi pan, keshi, buscuchi dushi, y snacks.

Un mecanico di municipio San Francisco a bisa: “Mi a come pan henter siman, ora cu tin mantena mi ta come cune of cu keshi.  Tambe mi ta cumpra buscuchi.”

Un pensionado Nerio Perez, a bisa cu e no sa con su futuro lo ta.  “Mi ta parce un Zombie, mescos cu bo ta mira den pelicula.  Den dia pa mi keda wowo habri, mi ta bebe hopi coffie y mi ta bende coffie tambe.  Mi ta bende hasta dos thermo den oraan di mainta.  Aunke tin biaha Maracibo ta yega temperatura di 40º Celsius, nan ta sigui bebe coffie cayente na cantidad.

Otro habitante ta opta pa prepara cuminda cu nan tin den nan frigidaire, pa e tres cuminda di dia.

“Mi mama mester a bay hasa un galiña. Nos a kere cu coriente lo bin bek, y na final e no a yega nunca.  Pa desayuno, almuerzo, y cena nos a come e galiña, pasobra sino e lo a bay daña.”  Esey ta loke Graciela Portillo a bisa, kende ta un periodista di Maracaibo.

Algun negoshi y cas tin generator pa toch anochi a lo menos por cende un fan pa drumi sin calor.  Pero e mesun desordo di generator ta strobando barionan di drumi, y aki tambe tin reclamo na cantidad.

Y tur esaki ta afectando e habitantenan na forma psicologico, pasobra nan no sa ki ora coriente lo bin bek, of ki ora un blackout lo socede atrobe.

 

- Advertisement -

DUNA COMENTARIO

Please enter your comment!
Please enter your name here