Home Enseñanza Bloke Sindical a sostene SIMAR y lo sigui uni pa tuma e...

Bloke Sindical a sostene SIMAR y lo sigui uni pa tuma e siguiente stap

116
0
SHARE
- Advertisement -

Un average di 400 maestro a presenta na SIMAR:

ORANJESTAD (AAN) – Josephina Albertus, Presidente di e sindicato di SIMAR tabata hopi contento di a mira un bon asistencia di maestronan den e sede sindical y tambe y tambe a gradici e sosten ricibi di su coleganan sindical pa mustra cu SIMAR no ta su so den su demanda pa, entre otro, indexering.

Sra. Albertus a subraya cu nan ta trahando uni y manera e refran ta bisa “Union ta haci forza” y esey nan ta sigui bay dilanti cu nan lucha y pa fiha un posicion pa e siguiente stap.

Tur e maestronan presente a priminti SIMAR cu nan lo tey den e siguiente stap pa mustra comunidad y Aruba completo cu e situacion cu tin mester caba y tin cu bin mehoracion.

E lider sindical a subraya cu enseñanza ta un gran parti di e futuro di Aruba y tur mucha cu ta awo na scol mañan ta forma parti di e futuro di nos pais, y mester tuma nan hopi na serio.

Sra. Albertus ta calcula cu tabata tin entre 300 pa 400 maestro presente den e sala di e total di 1660 docente cu tin na Aruba, y esey ta un bon comienzo. E ta spera cu den un siguiente reunion e cantidad di maestronan lo ta mucho mas grandi.

E siguiente stap lo wordo defini hunto cu e otro sindicatonan, pa mustra cu SIMAR no ta su so, pero nan ta uni.  Despues cu e maestronan a bolbe scol pa sigui nan les regular, e representantenan di e bloke sindical a sinta hunto.

Nan ta consisti di Josephina Albertus, Sindicato di Maestro (SIMAR), Magaly Brito, Sindicato di Empleadonan Publico y Priva (SEPPA), Eduard Maduro, Sindicato di Aduana (SADA) y Joselito Dirks, Sindicato di Polis (SPA) a reuni den SIMAR y nan meta ta pa gobierno bin cu otro proposicion.

SIMAR: Presidente di SIMAR Albertus a expresa cu ta un berguenza cu ainda nan no tin claridad, asina ta cu nan lo sigui te ora haya un contesta di gobierno.

SPA: Di parti di Sindicato di Polis, su presidente Dirks a bisa cu nan lucha ta fuerte y cu e sindicatonan ta mas uni cu nunca. SPA mes for di April ta sintando cu gobierno pero nan no a haya ningun contesta concreto y nan kier sa con 2018 lo wordo paga.

SPA a cuminza cu un forma di accion y e intencion ta pa sigui cu esaki y pa haya un contesta di gobierno con indexering 2018 lo wordo paga.

SEPPA: E Presidente di SEPPA Magaly Brito a duna di conoce cu nan a pasa caba un ronda cu tur nan delegadonan. Nan delegadonan a bay papia cu tur e trahadornan pa informa nan con leu nan ta cu e discusion riba indexering, y diahuebs nan a papia cu un grupo di maestro pa informa nan tambe y e sindicato ta contento cu e asistencia cu tabata tin.

Brito a bisa cu indexering ta un di e componentenan cu e empleadonan por para pa un ahuste di nan salario y nan no ta dispuesto pa laga esaki bay.

E lider sindical a splica cu e ultimo añanan no tabata tin aumento di salario ni ahustacion pa empleadonan publico; pero e medidanan of ahustacion cu constantemente gobierno ta tuma, cu a pone e costo di productonan hopi halto, tin e trahadornan publico hopi preocupa y e ta haci cu nan ta dispuesto pa para pa alomenos e 3.6% cu nan ta haya cu ta nan derecho y nan ta spera cu esaki wordo negocia y yega na un entendimento cu gobierno.

SADA: E presidente di SADA sr. Eduard Maduro a menciona cu nan tabata tey pa sostene SIMAR, y despues cada un riba su mes, ta bay cerca nan respectivo miembronan pa haya e mandato riba kico lo ta e siguiente stap.

E sindicalista a subraya cu e bestuur tey pa reuni, of duna conseho na nan miembronan, pero na final di dia ta e miembronan ta esnan cu tuma decision. SADA no ta tuma un decision sin consulta cu su miembronan. Pues, e bestuur di cada sindicato tin cu yama un reunion cu nan miembronan.

SADA tambe ta reuniendo cu gobierno for di April, pero gobierno no ta bin cu un decision concreto apesar cu nan a bin cu algun proposicion y ideanan di con e tema di indexering a wordo atendi.

El a reitera locual e sindicatonan a yega di splica caba cu e situacion awo ta diferente cu den pasado, pasobra awo tin un acuerdo di 2014 cu ta cambia full e panorama. Maduro a expresa cu e sindicatonan ta compronde e situacion general di gobierno, pero esaki tin cu asumi su responsabilidad.

- Advertisement -

DUNA COMENTARIO

Please enter your comment!
Please enter your name here