ORANJESTAD (AAN): Tabata Diabierna anochi cu Rescue and Coordination Center (RCC) di Guardacosta, a ricibi un yamada di auxilio riba VHF Marine Radio canal 16.
Esaki ta e canal di emergencia riba Marine Radio.
E informe di auxilio a bin di e boto piscado cu yama “Sanchimar”.
E piscado Curasoleño a notifica na RCC cu nan boto ta yenando cu awa, y cu e momento ey nan tabata cerca di e awa teritorial di Venezuela.
Mesora Guardacosta a laga e avion Dash-8 di Guardacosta lanta vuelo y a cuminza move den direccion di e area unda e piscado tabata.
Ora cu nan a yega, nan no a mira ningun boto. Diripiente esnan den e Dash-8 a mira un obheto cu tabata drief den lama. E obheto a resulta di ta un frigidaire cu e piscadornan sa pone abordo pa asina warda pisca cu nan caba di captura.
Sinembargo no a mira nada di e boto, y tampoco di e piscadornan.
Segun Guardacosta, desde Diabierna anochi nan a keda busca e piscadonan, y a haya yudanza tambe di Guardacosta Venezolano. Tambe tin mas boto y yate di Curacao cu a bay duna un man y yuda cu e buskeda.
Te cu Dialuna merdia, segun Guardacosta a bisa den un boletin, no a haya e piscadornan aki ainda.
