Calidad vangrail brug Balashi importante den contracto di pago

    997
    0
    SHARE
    - Advertisement -

    E brug ta parti di e proyectonan PPS cu financiamento special 

    Brug ta parti di e proyectonan Bo Aruba cu ta den man autoridad 

    ORANJESTAD  (AAN): E accidente na brug di Balashi por haya un rabo sumamente largo. Inspeccion di e calidad di e brug no solamente por dicidi si por sigui uza e brug sin haci cambio di siguridad, pero tambe por tin resultadonan financiero sumamente importante.

    E brug di Balashi ta parti di e proyectonan PPS, cu ta parti di e proyectonan di “Bo Aruba” cu actualmente ta den man di autoridad na Aruba y por conduci na persecucion penal.

    E problemanan cu a surgi na hospital a duna prueba pa e motibo cu Algemene Rekenkamer di Aruba a start un investigacion di e proyectonan di Bo Aruba di Gabinete Mike Eman.

    Den e cobertura cu Hospital a haya a base di problemanan cu a presenta na momento di entre otro yobida y cu e boiler, responsabilidad pa e constructor a bini den publicidad.

    Awor otro proyecto di Bo Aruba ta den atencion maximo despues cu dos auto a accidente riba e brug di Balashi, cu ta parti di e proyecto total di 130 Miyon Florin pa e “Green Corridor” e caya berde entre Oranjestad y San Nicolas.

    E accidente aki por bay tin resultadonan sumamente serio banda di e hecho cu e victimanan por pidi compensacion si resulta cu e brug no a wordo construi debidamente pa loke ta trata siguridad.

    Bida di hende ta directamente na peliger segun informantenan cu a duna informacionnan valioso den e caso aki na DIARIO, cu ya den edicion di ayera a indica riba importancia di investigacion di calidad di e brug.

    E construccion di e brug a tuma luga a base di e sistema “Design, Build, Finance and Maintain” (DBMF) y financia pues a base di un contracto special. Segun e acuerdo pa realisacion di e brug, no tabata tin inversion na inicio pero durante 18 aña tin pago di e suma pa “beschikbaarheid” cu segun informante ta 16.2 Miyon.

    Esaki tabata uno di e motibonan pa den e Rapport di Algemene Rekenkamer Aruba riba e proyecto, a wordo deduci cu e proyecto total lo sali 292 Miyon na luga di e 130 Miyon planea.

    E proyecto ta parti di e totalidad di “Bo Aruba” di gobierno Mike Eman, cu segun Algemene Rekenkamer Aruba tabata tin riesgo halto di Aruba, cu no por controla e proyecto.

    Kico ta bay pasa awor ta e pregunta grandi. Potretnan ta indica cu tin un diferencia entre e vangrail na e parti mas ariba di e brug y e luga caminda e vehiculo a accidenta. Si por prueba cu e brug tin problema di calidad pa sigura bida di personanan cu ta trafica riba e brug, e por tin resultado pisa.

    E calidad di e brug lo bini na discusion y pa e personanan cu por a bira victima fatal y sigur a sufri door di accidente por tin motibo pa reclama construccion di e brug, cu mester por proteha hasta pa vehiculonan pisa of maneha cu velocidad halto.

    Esaki por tin consecuencia pa esun cu lo ta responsabel pa paga, mescos cu den caso di hospital cu tambe ta proyecto di Bo Aruba.

    Den e caso aki ta pio pasobra ta trata di un contracto cu ta exigi mantencion tambe banda di construccion.

    DIARIO lo sigui elabora riba e topico aki. Pa autoridad tambe algo sumamente serio ta pendiente debi cu e totalidad di e proyecto Bo Aruba ta den man di autoridad pa dicidi si gobierno Eman ta wordo persigui pa e forma cu a gasta placa di Aruba.

    - Advertisement -

    DUNA COMENTARIO

    Please enter your comment!
    Please enter your name here