Aruba Cybercrime Awareness Seminar 2019
ORANJESTAD (AAN): Camara di Comercio ta organizando pa dia 7 di november proximo un seminario den colaboracion cu NetPro Group cu e tema: ‘Cybercrime awareness”.
E crimennan cibernetico ta creciendo na un velocidad masha halto y cada biaha personanan sin escrupulo ta hayando formanan mas innovador pa ataca e organizacionnan na Aruba cu propositonan nada bunita.
Nan no ta haci diferencia entre un compania grandi y un chikito.
“Nos ta notando un aumento significativo den e atakenan digital, na Aruba, pero tambe na Corsow y Bonaire, unda e companianan di 1 te cu 20 empleado ta e target”, Jurgen Hof, managing director di NetPro Group Bonaire a expresa.
Tin varios caso conoci di ‘ransomware’ den cual e empresarionan mester a paga hopi placa pa recupera e acceso na nan sistema y nan basenan di dato.
Debi na e crecimento di e ‘cybercrimen’, ta importante pa crea conciencia ariba e ciberseguridad na e islanan ABC y ta pesey cu nos ta apoya e iniciativa aki na Aruba”, Hof a agrega.
E seminario aki ta dirigi na directornan, doñonan di negoshinan, gerentenan, profesionalnan di IT, interesadonan, kendenan lo haya e informacion relaciona cu e menazanan recien. No ta trata solamente di haya sa di e menazanan sino di crea conciencia di e peliger y progresa.
Ta bay tin dos oradornan, cual ta, Dave Maasland, CEO di e compania di seguridad ESET, y Erik Jan Koedijk, presidente y miembro di e ‘Advisory board of Alert Online’ y miembro di e conseho asesor di e Cuerpo di Polis Hulandes.
E seminario lo tuma lugar den e auditorio di Camara di Comercio, di 9 am – 12:30 pm. Por registra pa medio di businessinfo@arubachamber.com
