Home Remitido Caso Aduana ta exigi expresion di organonan oficial di Estado

Caso Aduana ta exigi expresion di organonan oficial di Estado

28
0
SHARE
- Advertisement -

Gobierno anterior a mara un pueblo den crisis na pago

Situacion sumamente serio por presenta pa Aruba

ORANJESTAD(AAN)– Proximamente gobierno Wever-Croes mester atende cu Aduana basa riba e veredicto di Corte. Esaki ta implica probablemente cu gobierno mester bay subi salario di miembronan di e Cuerpo di Aduana na momento cu ta cuminsa habri caminda pa retiro boluntario como medida den crisis.

“No mester descarta cu Aruba ta para dilanti di desaroyonan serio mientras e pais ta bay conoce culminacion di e problemanan financiero cu lo desemboca den medidanan di austeridad,” informantenan a bisa DIARIO.

Siman pasa ya a wordo anuncia cu Gobierno Wever-Croes manera por a wordo spera, lo mester start cu posibilidad pa retiro boluntario den seno di e aparato publico como medida di austeridad.

“Den henter e caso aki, e personanan cu a origina e problema serio mes ta sali liber te awor,” un informante hopi preocupa a mustra DIARIO.

El a indica cu e miembronan di Aduana mes no mester wordo culpa. “Nan ta haci loke tur hende lo haci den e situacion actual cu ta busca un forma pa sali for di nan situacion dificil,” a wordo splica.

El a remarca cu for di 2014 gobierno Mike Eman tabata na haltura cu e situacion di Aruba lo no  permiti mas aumento di gasto di gobierno. Pero a bay sconde e realidad di e situacion tras di e proyecto Citgo.

Segun informantenan clave, gobierno Mike Eman a pensa cu e lo bolbe haya un mayoria absoluto na 2017 pa asina el a keda na poder cuater aña mas. Pues ora e desastre di Citgo cu e tabata sabi cu lo a rementa, a presenta, e lo tabata den stoel di gobierno ainda.

Na juli 2017 gobierno Eman tabata na haltura cu e no por a paga Aduana loke tabata pidi y mester a splica cu nan no tin placa.  No mester a mara Aruba na loke por bay sosode otro siman.

Na momento cu gobierno Wever-Croes yega na un areglo beneficioso pa e miembronan di Aduana, por spera un efecto di spiraal cu lo por afecta Aruba seriamente.

Segun informantenan awe organonan oficial di Aruba mester informa si loke gobierno Mike Eman a haci den caso di Aduana ta permisibel y no ta castigabel.

“A hinca e pais den un situacion financiero hopi dificil na 2017 y a laga e situacion pa gobierno actual cu mester tuma medida contra henter Aruba y asina afecta tur entrada pero na mes momento aumenta su gastonan pa cual e Arubiano afecta mester paga,” a wordo indica.

DIARIO ta en busca di informacion di expertonan riba e materia aki. Mester bisa cu ta trata di un situacion unico ya cu no ta normal cu un gobierno, algun luna prome cu eleccion, ta mara un pais na un gasto importante.

- Advertisement -

DUNA COMENTARIO

Please enter your comment!
Please enter your name here