Home General Caso penal Fondo Desaroyo Nobo San Nicolas mester tabata les pa Mike

Caso penal Fondo Desaroyo Nobo San Nicolas mester tabata les pa Mike

116
0
SHARE
- Advertisement -

Analisis 

Ora Mike Eman a asumi poder na 2009, e mester tabata na haltura cu tur cos den bida tin dos banda. Mike Eman no a habri un empresa priva cu su placa pa dicidi con e kier gasta loke ta di dje, pero a dicidi di crea su futuro riba politica.

Mike Eman a dicidi di pone tur otro forma pa gana bo pan den bida un banda, pa e ta parti di e scenario politico cu aparentemente ta su mundo di encanto.

Awe cu partido di Mike Eman ta den problema cu autoridad, Mike Eman ta bolbe recore na su parti sentimental y emocional cu e sa di uza pa traha riba sentimentonan di pueblo.

Mike Eman mester a conoce ley di Aruba cu ta mustra bon cla kico ta pasa ora bo no tene bo mes na regla den gobernacion. Mike Eman por a dicta catedra den esaki si el a uza no solamente e conocemento cu como “meester” e mester tin, pero tambe e experencia cu awor e kier uza pa causa emocion y crea e impresion cu e ta manipula atrobe.

Den e menasa publico cu el a lansa na nomber di AVP pa bay hiba hende Ministerio Publico, Mike Eman a papia di e caso penal Fondo Desaroyo Nobo San Nicolas. El a uza e caso aki, pa papia di persecucion politico door di Ministerio Publico.

E caso cu no a haya un final den Corte, pero pafo di Corte, a nace a base di un investigacion con placa di pueblo mester wordo uza segun e ley cu semper DIARIO ta trece dilanti y cu ta sagrado den e maneho financiero di e pais.

Den e caso aki tabata tin mas acusacion cu solamente uza placa di pueblo sin bon administracion y control y bay contra reglanan di entre otro presupuesto cu Parlamento mester aproba.

Den e caso aki ta topa pues cu elementonan cu DIARIO a trece dilanti den e forma cu Mike Eman a atende cu Citgo den Parlamento, pero sigur leynan cu gobierno Mike Eman a introduci contra conseho di instancianan oficial.

Diferente ministro di e gobierno Henny Eman a wordo acusa y tambe Henny Eman mes. Algemene Rekenkamer a emiti un rapport den cual el a pone reglanan legal dilanti. El rapport ta basa riba un proyecto similar na Bo Aruba cu un proyecto grandi y 12 proyecto mas chikito pa un suma di 30.5 Miyon, cu no a wordo bon maneha y cu a laga buraco habri pa entre otro “destaho publico”.

E caso, manera tur caso administrativo den cual entre otro mester check tur cifra y documentacion, a bay Hues.

DIARIO a sostene e hecho cu no tabata tin indicacion directo cu Henny Eman por a wordo acusa di cierto hecho pasobra e mester tabata na haltura como Ministro Presidente. Mike Eman sa bon den cual direccion nos ta mustra.

Henny Eman a sali liber y otro ministronan condena. Ministerio Publico a apela e sentencia den caso di Henny Eman y e otro ministronan e sentencia contra nan persona.

E caso a termina ora abogadonan a yega na un acuerdo cu Ministerio Publico  cu tur hende ta hala nan peticion pa apelacion atras.

Mike Eman mester tabata sa kico por pasa si no atende cu cautela cu placa di pueblo. Pero awe Aruba ta confronta cu un rapport Bo Aruba di Algemene Rekenkamer Aruba atrobe cu ta mustra bon cla con Mike Eman a atende cu placa di Aruba.

Mester yama Mike Eman danki? Mester duna Mike Eman un condecoracion pa loke el a haci cu Aruba?

Tristo con un pueblo ta wordo agita cu emocion y manipulacion dor di Mike Eman cu aparentemente ta kere cu el a nace cu e corona di fishi di Ministro Presidente riba su cabes.

 

 

 

 

- Advertisement -

DUNA COMENTARIO

Please enter your comment!
Please enter your name here