Prome Mininster Wever-Croes:
ORANJESTAD (AAN) — “E conclusionnan di CAft no ta fabula ni storianan bunita, esey ta algo cu tambe nos ta reconoce. E situacion di Pais Aruba, no ta facil. Nos problemanan financiero no a soluciona ainda, nos a encontra situacionnan basta serio”, ta palabranan di Prome Minister Evelyn Wever-Croes, den conferencia di prensa di gobierno, Dialuna.
Bayendo un tiki atras den tempo, e mandatario a señala cu na 2014, pues apenas cinco aña pasa, Aruba tabata tin un deficit di 9.3% di su DGP.
“450 miyon florin nos deficit tabata e aña ey. Kico ta deficit? Deficit ta ora bo ta gasta mas cu bo entradanan. Si den bo hogar, na bo cas, si un luna e entradanan ta di mil florin pero bo gastonan ta 1.200 florin, bo tin un problema, pasobra bo gastonan ta 200 florin mas halto. Con ta bay haci? Bo tin cu bay presta placa, fia cen pa bo paga e 100 florin ey. Well, asina Aruba a wordo maneha door di gobierno anterior, y tabata tin un aña cu no tabata 200 florin, tabata 450 miyon florin”, Minister Presidente a subraya. E gastonan tabata mas halto cu e entradanan.
E aña siguiente e deficit a baha. El a bira 350 miyon florin, pero ketobay mester a fia placa p’esey. Pesey e debe ta yegando 90% di e DGP, segun Minister Presidente.
E dignatario a remarca cu cinco aña pasa Aruba su debe tabata 9.3% di su DGP. E aña aki ta 0.5% di e GDP. E ta 25 miyon florin ainda.
“Kiermen, weita e sacrificionan grandi cu gobierno, pero specialmente pueblo a haci, pa baha di 9.3% te na 0.5%, y esey ta locual pa nos ta determinante. Y nos ta trahando aworaki riba e prome presupuesto balansa cu nos mester pa no tin deficit mas pero pa nos haya surplus”, e mandatario a reitera.
E mandatario a señala cu apesar cu e deficit a baha di 9.3% pa 0.5% un debe di 90% di e DGP ta tin Aruba caminda cu e ta, y esey ta causa e inflacion cu tur hende ta keha di dje, den e dianan aki.
“Esey ta stroba nos economia di crece mas di locual nos tabata kier pa e crece. Esey tin nos mannan mara cu nos no por inverti manera cu nos kier den enseñanza, salubridad, cuido di nos grandinan. Esey ta e motibo cu nos mester yega na un surplus, pasobra ta yega e momento cu nos tin cu baha nos debe, pa asina nos baha inflacion y asina nos por stimula nos economia pa e crece mas y asina nos por cumpli cu e deseonan cu ta biba den nos comunidad tambe”, Prome Minister a declara.
E mandatario a reitera cu pesey gobierno ta trahando duro pa baha e deficit di 0.5% pa hacie 0% y por crea un surplus aunke sea chikito.
El a comenta cu tin hende cu ta bisa cu gobierno ta tardando demasiado; cu e situacion di Aruba ta duro, dificil, cu tur cos ta caro, y no ta mira mehoranza.
Prome Minister a expresa cu ora e mira atras y tur e retonan cu a enfrenta na caminda, y mira e exito cu gobierno tabata tin di bringa tur e retonan aki, e ta convenci cu den futuro e retonan cu tin dilanti, nan ta bay atende mucho miho.
“Tin hende ta bisa pues cu nos ta tardando mucho, pero shonnan laga nos ta hopi sincero cu nos mes. Loke a wordo desgracia ocho aña largo den e pais aki, dificilmente den dos aña bo ta yega y bo ta pone riba rails. Pero ban keda enfoca riba cosnan positivo. Ban keda enfoca riba e economia y e turismo cu ta creciendo, desempleo cu ta bahando, Aruba ta birando mas sigur, y asina duna nos tambe un poco mas tempo, pa nos caba di atende cu tur e retonan”, Prome Minister a señala y a conclui bisando un biaha mas cu e tin fe y confianza cu door di determinacion gobierno ta logra tambe.
