Lilliana Rasmijn, Vocero di Polis
ORANJESTAD (AAN): Ultimo dia pa entrega peticion pa permiso pa benta di clapchi ta diabierna 15 di November proximo, asina vocero di Polis, Lilliana Rasmijn a duna di conoce.
El a indica cu tur e proceso aki ta wordo coordina entre tur e departamentonan concerni. A bisa cu e peticion compara cu aña pasa a keda casi mesun cos. Mayoria di peticion a wordo haci for di tempran caba y poco sa pasa cu te na ultimo ora ainda tin esnan cu ta bay haci nan peticion.
Mayoria di e peticionnan ta di hendenan cu sa bende clapchi tur aña caba y cu manera aña habri nan ta haci nan peticion atrobe, Rasmijn a señala.
Tur aña ta bira mas stricto pa loke ta e control. Pero kier recorda e bendedornan, cu den e reunion cu lo tuma lugar otro siman, lo pasa ariba e lista di rekisitonan un biaha mas y lo repasa tambe e parti di seguridad, tanto di e bendedor como di e comunidad.
No ta kita hende e posibilidad di disfruta di e vuurwerknan pero ta keda pone enfasis ariba e control cu ta tuma lugar manera debe ser. Polis ta para ariba e seguridad y pa no bende vuurwerk na menornan di edad.
Rasmijn a remarca pa mayornan na cas tira bista ariba e muchanan. Polis lo tene nan control diario durante e temporada di fin di aña, a agrega.
