ORANJESTAD (AAN)- E aña aki Copa Navideño ta celebrando nan di 5 aña y lo bay tin un total di 95 wega di softball cuminzando for di e weekend di 1 di November te cu e weekend di 6 di December.
Maiki Fingal cu ta un di organizadornan a splica cu e campeonato aki lo tin un duracion di 6 siman, cuminzando diabierna 1 November sigui pa tur weekend Diabierna, diasabra y Diadomingo y terminando dia 8 di December.
E torneo aki lo ta dedica na 4 persona kendenan ta Hectorn Capian di Los Amigos, Eddy Dirkz di Legend, Robby Koolman di Criollo Reds y Jimmy Werleman di Salo Park softball team. Nan ta 4 manager di team cu for di comienzo di e campenato Copa Navideño a participa cu nan team.
E aña aki tin bastante team participando caminda ta hopi wega di softball tin pa wak. Den team comercial tin 20 team cu ta wordo parti den 4 pool. Y den teamnan 40+ tin 8 team. E weganan di 40+ ta solamente riba Diadomingo.
Jose Kock cu tambe ta organizador a bisa cu pa 5 siman e weganan lo bay tuma lugar riba veld di Flatstone. Y e ultimo siman cu ta 6. 7 y 8 December e weganan lo tuma lugar riba veld di Kudawecha. Esaki pa motibo cu di 7 pa 8 December lo tin weganan maratonico cu ta bay for diasabra 7 December mainta te cu Diadomingo 8 di December den oranan di anochi ya cu den oranan di marduga tin weganan di teamnan di casino. E final lo ta bon anima pa Youth Extreme for di 4’or pa 8’or di anochi.
E team campeon pa 40+ lo ricibi como premio 10 caha cerbez, un copa mas un basket, na di dos lugar ta ricibi 5 caha cerbez, un copa mas basket y na di 3 lugar 3 caha cerbez, un copa mas basket.
Pa team campeon comercial ta haya 5 caha cerbez + copa, + basket, y na di dos lugar 3 caha + copa + basket.
E organizadornan a invita tur amantenan di softball pa pasa disfruta di e tremendo weganan tanto riba veld di Flatstone como tambe e weekend final riba veld di Kudawecha.
