ORANJESTAD(AAN): Diaranzon mainta Richenella Wever, Team Coordinador di e asina yama ‘uitgifte centrum’ di DIP a duna un splicacion riba e peticionnan pa vivienda Erfpacht cu DIP a atende cune.
“Nos ta yegando na e ultimo grupo pa aña 2019, pa loke ta trata e pre-reservacionnan”.
“E biaha aki nos ta bay trata tur esnan cu a yega na remarke y cu a haci nan peticion na 2010, 2011 y 2012”.
“Den e proximo dianan aki te cu otro siman, cada persona cu a yega na remarke ta bay ricibi un carta di invitacion pa e atardi y anochi di informacion, cu ta bay ta dia 15 di November”.
Esaki segun Wever, kende a sigui bisa cu e personanan ta bay wordo splica durante un presentacion, kico ta loke ta bay pasa na momento cu nan haya nan pre-reservacion y kico ta e siguiente pasonan te na momento cu nan haya e derecho di erfpacht pa construccion di cas.
“E ta un total di 892 persona cu a yega na remarke pa e grupo aki, cu ta un grupo basta grandi”.
“Tur esnan cu a haci un peticion aki mester keda pendiente, cu nan ta bay ricibi un carta na e adres unda cu nan ta inskribi na Censo”, segun Wever.
E presentacion y dunamento di informacion ta bay ta na Club Caiquetio.
