Fiscal a exigi 6 aña di prison
ORANJESTAD (AAN) – Algun siman pasa e sospechoso homber R.R.H. a scucha Fiscal exigi 6 aña di prison pasobra Fiscal ta haya cu R.R.H. a purba di mata e homber L.M.
E incidente aki a sosode dia 17 November 2018, caminda R.R.H. pafor di su cura di cas a tira L.M. tres biaha den lomba. R.R.H. a bisa Hues cu el a haci esaki pasobra e tabatin miedro cu L.M. lo bay busca un arma pa mat’e.
MENAZA PA DEBE DI PLACA
Dia 4 di October 2019 tratamento di e caso a tuma lugar caminda Hues a bisa cu 17 November 2018 tabatin un tiramento den Caya Juancho Kock. R.R.H. a admiti di a tira 3 biaha biaha riba L.M. Hues a puntra R.R.H. pakico el a tira. Segun R.R.H. tabatin un discusion cu L.M. tocante placa cu R.R.H. lo debe. Esaki ta un asunto di bendemento di un scooter caminda R.R.H. a bende esaki y no a paga L.M. tur e placa. Segun R.R.H., el a paga L.M. completo. El a bisa cu L.M. ta un persona hopi peligroso y ta busca problema tur caminda. El a bisa cu L.M. a menace diferente biaha y pesey el a busca un arma di candela pa defende su mes. Segun R.R.H., ora el a bay Hulanda L.M. a bay su cas y a bisa su swa cu e tin un bala cu nomber di R.R.H. ariba.
TIRA TRES BIAHA DEN LOMBA
Dia 17 November 2018, L.M. a bay na e cas di R.R.H. y den cura a cuminsa discuti cu e no ta bay si e no haya su placa. R.R.H. tabata hunto cu B.O. den cura y a bisa L.M. pa bay su cas pasobra e no tin mas placa p’e. E momento ey L.M. a kita su caminsa pa bringa. E amigo di R.R.H., B.O., a kita L.M. pa bay pafor. R.R.H. a bay den apartamento y den cushina abao den un cashi a coy e arma y hink’e den su saco di carson. El a bay pafor di cura bay para banda di auto. Segun R.R.H., L.M. a saca un sker p’e. E ora ey R.R.H. a cuminsa papia cu L.M. pakico e no ta wak pa su yiu muher y stop di busca problema. L.M. a bis’e cu e ta bay bin mat’e. Segun R.R.H. ora L.M. a bisa cu e ta bay bin mat’e, el a saca e arma y a tira L.M. cu tabata di lomba p’e canando bay.
Hues a puntr’e pakico el a tira. R.R.H. a bisa cu door di spanto el a tira pasobra L.M. a yega di tira mata caba. El a los 3 tiro. R.R.H. a entrega su mes y a mustra unda e tabatin e revolver scondi. Polis a haya e revolver cu 2 bala ainda aden. Psychiater a bisa cu R.R.H. tabata hopi emocional door di situacion y e dia lo a perde cabez y tabata menos responsabel pa tira.
VICTIMA A KEDA MANCARON
Abogado mr. Zara a presenta raport di dokter cu ta mustra cu entre 17 November 2018 y 17 December 2018, L.M. a keda interna den hospital pa e tres tironan cu el a sufri den lomba. E balanan a bora pulmon, dos buraco den stoma y tambe schouder y man drechi. Mester a haci tres operacion hopi grandi riba L.M. Dokter a bisa cu e recuperacion di L.M. lo bay dura hopi largo. Hues a lesa e raport y ta conclui cu ta herida severo L.M. a sufri.
Abogado mr. Zara a demanda 20 mil florin y inmaterial 30 mil florin. Mustra cu door di tiro, L.M. no a traha mas y mester cria su yiu. Ainda e ta bou tratamento. Door cu el a sufri herida severo e no por traha. Actualmente el a haya subsidio di gobierno pa mancaron. E lo keda mancaron pa resto di su bida door di tiro. Tur anja e lo mester evalua si e por traha y si e ta keda haya subsidio. L.M. a bisa cu e no por haci trabou pisa.
EXIGENCIA DI FISCAL
Fiscal a bisa Hues R.R.H. a admiti di a tira 3 biaha riba L.M. Fiscal a remarca cu L.M. no a coopera cu Polis pa cu su situacion. Fiscal a sigui bisa cu danki Dios cu L.M. no a muri. E ta haya cu aki por papia di intento di mata. Psychiater ta papia di cu R.R.H. no ta completo responsabel. Na opinion di Fiscal, si mira ki castigo Corte Superior ta duna pa tiramento, Hof ta duna 8 aña pa intento di mata cu arma di candela. Fiscal ta haya cu tin un diferencia cu e caso aki mirando cu L.M. tabata menaza R.R.H. Tin diferente testigo ta bisa cu L.M. a menaza. E ta haya cu R.R.H. a bay di mas pa cumpra un arma pa defende su mes. Pa cu e castigo, Fiscal a bisa cu e ta tene cuenta cu esaki y cu L.M. su carchi di castigo ta mustra cu e ta peligroso.
Pa cu e demanda di daño, Fiscal a bisa cu tin e chens pa den casonan penal haci demanda. Den e caso aki e no ta facil pa determina e daño door cu L.M. no por a traha y ta haya cu mester haci un caso civil. Fiscal ta haya cu L.M. tambe a busca y mester determina e comportacion di L.M. den e caso aki pa calcula un daño inmaterial. Pesey e ta haya cu mester declara L.M. no admisibel y pa haci un caso civil. Fiscal a exigi 6 aña di prison pa R.R.H.
Hues a bisa cu e ta bay studia e caso y Diabierna awor, 25 October 2019 e lo dicta sentencia. DIARIO lo informa lectornan kico ta e decision di Hues.
