Home Hudicial Diescinco aña di prison exigi pa Canades sospecha di a tira un...

Diescinco aña di prison exigi pa Canades sospecha di a tira un Chines mata na Jaburibari

327
0
SHARE
- Advertisement -

ORANJESTAD (AAN): E Canades Michael Gibson, acusa dia 1 Mei 2017 pa asesinato di e Chines H. Quach den un apartamento na Jaburibari y tambe posecion di arma di candela, a tende Fiscal exigi 15 aña di prison.

Pa basta tempo e caso aki ta andando, caminda a pidi autoridad na Toronto (Canada) pa scucha testigo pero no mucho cos a resulta di esaki. Por a compronde cu un homber cu kier a scucha como testigo na Canada a worde asesina y su amiga den promer instante no kier a papia. Despues di hopi intermediacion di autoridad Canades, e amiga a dicidi di duna un declaracion pero no a haya mucho informacion.

Abogado mr. Faarup ta haya cu ta un di e otro amigonan cu tambe tabata den e apartamento e momento ey, ta esun cu a tira. El a bisa cu a haya muestra di polvora di tiro tambe riba man di e otro amigonan. E arma a worde haya den WC di e apartamento.

Ta asina cu e sospechoso Gibson no kier duna declaracion y Fiscal a trece esey padilanti. E sospechoso a bisa cu e no a tira y no kier a haci nada malo cu e victima. El a bisa cu si e bay duna declaracion, e lo bay punta dede riba otro y esey lo pone su famia na Canada den peliger.

El a bisa Hues cu no conoce su cultura na Canada cu si e bay papia e por pone bida di su famia na peliger. Pesey el a tuma decision di keda keto riba conseho di su abogadonan.

Na Juni 2019 a surgi un desaroyo nobo den e caso aki cu a pone cu a pospone e caso pa ultimo biaha. E sospechoso Michael Gibson a bisa Hues cu e no kier mas asistencia di abogadonan mr. Faarup y mr. Illes pasobra e no ta confia den nan.

Esey a haci cu Hues mes a dicidi di bay apunta un abogado pa Gibson mirando cu ta tarda demasiado. Hues a bisa cu segun ley, e por haci esaki.

Riba Diabierna por a mira abogado mr. Arendsz-Marchena presenta den sala di Corte cu un maleta riba wiel. E maleta tin tur e documentonan relaciona cu e caso.

Fiscal ta haya cu tin suficiente prueba cu ta mustra cu ta Gibson a tira e Chines Quach mata. Fiscal a repasaya tur e escenanan pa mustra cu tur cos ta mustra cu ta Gibson ta esun cu a tira. Fiscal a exigi 15 aña di prison, kitando e tempo cu Gibson ta sera den KIA.

Hues awor ta bay studia e punto di bista di Fiscal y e defensa presenta pa mr. Arendsz Marchena y dentro di algun siman lo por spera sentencia.

- Advertisement -

DUNA COMENTARIO

Please enter your comment!
Please enter your name here