Home Politica Discusion profundo entre gobierno y sindicato riba inflacion/indexering ta un necesidad

Discusion profundo entre gobierno y sindicato riba inflacion/indexering ta un necesidad

73
0
SHARE
- Advertisement -

Benny Nisbet (PPA):

ORANJESTAD (AAN):  Benny Nisbet  di PPA ta indica cu pueblo di Aruba por a nota cu  trahado di diferente departamento di Gobierno ta luchando pa  ‘indexering’  wordo paga na nan.  Tin e grupo di  Douane cu tin un acuerdo cu Gobierno  caba pero  hecho ta cu gobierno ta nenga di ehecuta e acuerdo cu Gobierno (anterior) a firma cu Douane.

Sindicato di maestronan tambe ta luchando pa nan miembrecia ricibi nan indexering.

Tambe pueblo por a tuma nota cu personal di Cuerpo di Polis tambe a bin den accion despues di a purba combersa cu gobierno pa un periodo. Y varios otro sindicato cu ta representa trahado di gobierno ta den e mesun lucha aki!

Reaccion di  un parti  grandi di nos pueblo via e.o.  media social pero tambe den comunidad ta poco negativo den direccion di ‘ambtenaar’.  Segun hopi den pueblo e ‘ambtenaar’ aki lo ta actua contra  ‘interes di Aruba’ pasobra  Aruba ta den un crisis financiero enorme.

Sector Priva:

Mientras tanto pueblo por a tuma nota cu varios  C.A.O. a keda firma entre diferente instancia/compania  y nan trahador  den curso di e ultimo simannan. Apesar cu  no t’asina cu tur informe di e C.A.O. nan aki a wordo publica PPA ta sigur cu den mayoria C.A.O. ta trata aumento di salario y/of duna  pago na  ‘indexering’ a consecuencia di e cifranan di Inflacion.

Pakico pago di Indexering  ta esencial !

PPA ta conclui cu pueblo  no ta comprende bon kico  ‘Indexering’ ta nifica of no ta comprende e consecuencia  desastroso pa e  ‘forza di compra’ di e trahador si simpelmente baha cabez y permiti pa durante un periodo largo  e  Indexering No wordo paga!!..

No cabe duda cu  paga  ‘Indexering’  door di Gobierno dentro di e crisis causa pa e Mega Debe lo tin consecuencia serio/dramatico  pa gobierno cu kier baha gasto bow presion di Hulanda e.o.  pero na e otro banda No paga ‘indexering’ door di gobierno den su calidad di  ‘doño di trabou’ tambe tin consecuencia pa e  clase trahador esta e ‘ambtenaar’ den e caso aki..  E  forza di compra di e ambtenaar lo baha substancial cu consecuencia ‘dramatico’ pa su famia !

Esaki ta causa un  tension enorme entre gobierno y su  cuerpo di ambtenaar y un reto pasobra tur esaki ta parti di goberna nos isla!

Ta Intencion di PPA pa purba duna informacion cu e articulo aki na pueblo …

Pakico ambtenaar of nan sindicatonan tin e derecho y hasta e deber di purba haya  indexering paga pa nan miembrecia  mientras cu  tur gobierno ta consciente cu  e clase trahador den e caso aki e ambtenaar  tin derecho  di puntra  a lo menos claridad  entre  nan representacion y gobierno.

Imaginabo cu pasobra Aruba ta den un crisis di Mega Debe  cual kizas lo  por dura entre 20 pa 25 aña sali for di punto di salida cu No lo paga ‘indexering’ durante e periodo aki  y tur esaki bow di presion di pueblo cu ta critica e ‘ambtenaar’ den e caso aki.

Awor  kico ta  Indexering ???

Indexering ta nifica  adapta  salario/pensioen/onderstand etc  na e cifra di Index (indexcijfer!).  Esaki despues cu wordo constata cu tabata tin  asina yama  ‘inflacion’.

Inflacion ta afecta e valor di  e salario cu un trahado ta cumpra e ta baha su forza di compra.  E meta di  indexering ta pa purba mantene e ‘forza di compra’ di e clase trahado door di aumenta su salario segun e  cifra di Index.

E Indexcijfer ta wordo determina despues cu  e  Inflacion a wordo determina  pa  p.e.  Departamento di Asunto Economico comparando e gasto di  un periodo cu e ultimo periodo  p.e.  2017 pa 2018 versus  2018 cu 2019.

Basa riba e comparacion aki Departamento Economico ta determina e Inflacion durante e periodo aki.

Realidad economico ta cu si un trahador NO ricibi un aumento di e  indexering cu sea ta e mesun cifra di  Inflacion of un parti di djele cu e ‘forza di compra’ di e clase trahado pero tambe p.e. un persona cu ta biba di ondestand/bijstand, pensioen (AOV) pa nos grandinan pero tambe ambtenaar/trahado den sector priva lo bay atras formalmente.

Tumando un ehempel  durante algun aña ban tuma 10 aña  como ehempel unda p.e.  e  Inflacion tabata 2% averahe/anualmente e trahador NO a ricibi ningun Indexering  esaki lo ta catastrofal pa esnan cu ta depende di e Indexering aki….pasobra e lo nifica cu nan ‘forza di compra’ lo a bay 20% atras.

Esaki ta nifica  cu e valor di compra cu p.e. f. 100,00 a bay barbaramente atras…….Si  como consumidor  e trahador por a cumpra 4 saco di cuminda cu e f. 100,00  diripiente e trahador por cumpra solamente  kizas 3 saco di cuminda!

No lubida cu ILO den su rapport di 2005 a bisa gobierno di Aruba: ‘Aruba  creates poverty & Aruba maintain’s  poverty’ un ponencia cu merece atencion y analisis propio di gobierno y sindicato.

Cu otro palabra  un discussion entre  trahado/sindicato  y doño di trabou/gobierno   encuanto posibel Indexering  ta  parti di nos sistema  e ta na su luga, cada uno  sindicato y gobierno como doño di trabou mester carga nan responsabilidad dentro di nos democracia. No cabe duda cu  e  hecho cu Aruba ta bow  controle di  caft ta hasi esaki ainda mas dificil. Pero presencia di CAFT ta consecuencia di ‘mal gobernacion’ (AVP) y entrego di nos autonomia (AVP)y prolongacion di esaki(MEPORED)!

Responsabilidad di Gobierno como gobierno pero tambe como ‘doño di trabou’!

Awo naturalmente e responsabilidad di Gobierno  como gobierno pa henter nos pais pero na mes momento como  doño di trabou ta uno delicado!

Ley y maneho basa riba e  informacion concreto  ta determina e porcentahe di inflacion y  cu tempo esaki ta e reto pa  sindicato y doño di trabou pa hunto determina kico ta responsabel pa paga pa e periodo aki di crisis.

Pesey mes gobierno jamas mester a permiti pa tin un instancia manera CAFT cu no ta carga responsabilidad constitucional pa determina e ‘plafond’ di p.e.  gasto personal sin cu gobierno a tene cuenta cu su responsabilidad como e.o. ‘doño di trabou’!

Si gobierno a permiti e plafond di wordo estableci  sin e analisis profundo aki anto gobierno a hinca su mes y su pais den problema profundo, pasobra  bo no por spera cu sindicato y nan miembrecia lo scoge pa no ricibi ‘indexering’ pa añanan largo, pasobra e ta nifica un atraso enorme pa e ‘presupuesto familiar’ un vez mas pa nan ‘forza di compra’.

E crisis financiero / Mega debe  cu Aruba ta den!!

PPA no ta  bisa cu gobierno  mester paga  ‘indexering’  ni cu e sindicatonan mester demanda esaki!!  Esaki  PPA ta laga pa cada instancia huzga basa riba nan propio responsabilidad.

Solamente PPA kier mustra riba cierto realidad dentro di nos sistema  y con nos pais nos ta funciona.  Esaki ta haci e  reto di gobernacion  un reto hopi pisa, mas ainda  durante  periodo di crisis!

Ta cu e reto aki den mente un gobierno mester forma su programa di gobernacion!

Ta cu e reto aki den mente un gobierno mester purba  baha gasto pero na mes momento ser realistico pa cu e ser humano. No por bisa cu e ser humano ta central y no ta aplica esaki pa bo propio trahado!

Banda di esey un gobierno tin e responsabilidad pa ‘educacion’ di su pueblo basa riba minimal e porcentahe  di inversion stipula pa UNESCO cu ta indica cu un gobierno mester inverti minimalmente 6% di e GDP di su pais den  educacion di su pueblo. Responsabilidad pa un maneho economico  y mucho mas ta riba tayo di gobierno y den un crisis un reto enorme!

ILO 2005!

Rapport di ILO na 2005 a indica un mensahe fuerte na  parlamento y gobierno riba e topico aki di inflacion y indexering. Y indirectamente na sindicato tambe.

A splica cu Aruba ta un pais cu ‘ta crea pobreza y ta mantene pobreza’  door cu den e periodo analisa pa ILO  Aruba no ta paga su trahado e indexering basa riba e ‘indexcijfer’, pensionado y cobrado di onderstand e  indexering riba cual nan tin derecho.  Hasta ILO a bay mas leeuw y a splica cu  no solamente cu e  Indexering no ta wordo paga debidamente pero cu  dentro di nos sistema di CPI  e trahador y  sigur esnan cu ta cobra  onderstand, bijstand y pensioen  no ta ricibi parti di e progreso NACIONAL economico  den ningun forma.  ILO a propone pa cambia e sistema cu Aruba ta uza cu ta e  Consumer Price Index (CPI) den un NAWI National Average Wage Index.  Te awe ningun gobierno a ni discuti e materia corda pa implementa cualkier cambio?

Conclusion:

PPA no tin e minimo intencion di instiga ningun instancia, ningun sindicato etc

nos ta consciente di e reto cu tin pa  tur  ‘participante/player’ den e cuadra  economico , syndical y  financiero-economico di nos pais y nos gobierno tin..

Meta di e articulo ta pa mustra riba  e problematica en general y e derecho y deber di cada uno envolvi.

No por critica un sindicato na momento cu e sindicato ta purba defende interes di su miembrecia!! Laga nan ehecuta nan deber y derecho!

Ta keda na e intercambio y e proceso cu Ley ta permiti  pa hunto  determina kico por y kico no por.

Al final e resultado lo mester sirbi interes general di nos pais !!

- Advertisement -

DUNA COMENTARIO

Please enter your comment!
Please enter your name here