Relaciona cu caminda ariba Green Corridor
ORANJESTAD (AAN): Director di DOW, Ing. Marlon Croes a laga sa cu nan a tuma nota di e rueda di prensa cu e comerciantenan di Pos Chiquito a yama recientemente.
El a indica cu den e proyecto di Green Corridor, durante e preparacion, tabata tin diferente evaluacion cu a tuma lugar.
Ta un proyecto cu a rekeri un inversion hopi grandi y ora cu ta haci inversionnan grandi asina ta hacie pa dos cos. Ta hacie pa aumenta e capacidad (fluho di trafico) y pa mehora e seguridad di trafico, a bisa.
Segun Croes, prome cu Green Corridor, por a constata con hopi trafico tabata pega for di San Nicolas direccion Oranjestad. Pa por mehora e capacidad ey cierto accesonan tin cu wordo cera pa garantiza e fluho di e trafico como e seguridad.
Pero e intencion no ta pa mata e negoshinan existente cu tin banda di e caretera, a remarca.
A señala cu nan a scucha e ponencianan di e comerciantenan y ta carga e atencion di DOW p’e, pero pa esaki hunto cu e minister encarga lo bay aconseha kico ta e opcionnan cu por tin y cu por yuda den margen di e contract di e metanan.
Marlon Croes a expresa cu DOW ta den combersacion cu minister y ta bay ta evaluando esaki pa asina por haci algo. Tin cu haci un estudio tecnico pa e no causa molester pa e fluho di trafico y pa e seguridad.
E comentarionan cu tin ta cu entre aeropuerto te na Pos Chiquito ta core bon pero ora di drenta Pos Chiquito ta perde e capacidad atrobe y di un ‘four -lane’ ta bay pa un ‘two – lane’ y asina mes cu tin e accesonan cera ta sinti falta di dje.
Dos punto debil cu tin den dje ta pasobra a crea for di Pos Grandi, unda La Granja ta, tres caminda. E caminda pa zuid, e caminda existente y e caminda bay panort mas atractivo pa por core.
Esey a trece cune cu pronto lo tin cu bay aumenta e capacidad den dos punto. Na Rooi Lamunchi y na Yaraweg.
Eynan trafico ta pega y pesey mester bay haci cambio y conhuntamente cu esey wak kico ta e beneficio pa por crea un otro acceso den margen di e contract pa por duna e comerciantenan un mihor acceso , Croes a indica.
