Home Deporte E aña aki Beach Tennis Aruba Open 2019 ta mas grandi cu...

E aña aki Beach Tennis Aruba Open 2019 ta mas grandi cu nunca!

63
0
SHARE
- Advertisement -

Segun Minister Dangui Oduber:

ORANJESTAD (AAN) – Dialuna mainta minister di Turismo, Salubridad Publico y Deporte sr. Dangui Oduber a haci bishita na Bushiri Beach.

Recientemente e beach aki a wordo crea como un atraccion nobo pa localnan, bishitantenan y pa tene e magno evento di Beach Tennis Aruba.

Aki e mandatario a tene un entrevista unda el a conta kico pueblo por spera di e evento menciona.

E mandatario a splica cu e prome fase di Bushiri beach ta cla, esaki ta e parti unda a pone santo blanco pa crea e beach. E di dos fase lo bay crea parkeo, drecha e landscaping y bin cu facilidadnan.

Awor cu e prome fase ta cla caba ya por mira con bunita e ta kedando, ora e proyecto finalisa e lo ta un beach pa pueblo crioyamente bisa, asina e mandatario a expresa.

Minister Oduber a menciona tambe cu mesun cos por spera pa Baby Beach tambe. Unda ta e Lone Palm Stadium tambe lo wordo cubri cu santo blanco y asina extende e beach di Baby Beach. E proyecto di Baby Beach lo tin groundbreaking pa fin di aña aki segun e mandatario.

E mandatario a splica cu ya for di aña pasa despues di e evento exitoso di Beach Tennis Aruba a sinta cu e organisadornan di e evento unda a trece e idea dilanti pa muda e evento di Eagle Beach pa Bushiri Beach. E motibo di esaki ta door cu Eagle Beach ta un beach hopi uza pa nos localnan y nos turistanan.

A splica e organisadornan e idea cu Gobierno tabata tin e tempo ey pa cu Bushiri y despues di varios deliberacion y varios reunion. E organisadornan a bay di acuerdo pa muda e evento pa Bushiri Beach, awe por mira con bunita e beach a keda.

Minister Oduber a bisa di ta sumamente contento pa por ta e main sponser di e evento aki atraves di fondonan di ATA.

E aña aki Beach Tennis Aruba lo ta mas grandi cu nunca, ta spera un total di 1400 participante y lo conta cu 45 cancha.

E participantenan aki ta bin di 42 pais pa competi y ta bin acompaña cu nan famia y amigonan.

Esaki ta haci Beach Tennis Aruba e evento deportivo di mas grandi na Aruba cu ta trese miles di bishitante riba nos isla.

“E evento aki ta cuadra cu e carteranan cu mi tin esta e cartera di Turismo y Deporte, ta forma parti di nos vision di turismo deportivo. E evento aki ta acapara hopi atencion internacionalmente y e aña aki ESPN lo cubri e evento aki exponiendo Aruba den un forma positivo internacionalmente” asina e mandatario a trece dilanti.

Finalmente minister Dangui Oduber kier a gradici Sjoerd de Vries y su team pa organisa e di 10 edicion di Beach Tennis Aruba. Un evento cu ta contribui grandemente nos turismo y economia, sigur e evento aki tin full support di Ministerio di Turismo.

- Advertisement -

DUNA COMENTARIO

Please enter your comment!
Please enter your name here