Home Gobierno E noticia cu Aruba ta keda libera di e contrato di Citgo...

E noticia cu Aruba ta keda libera di e contrato di Citgo no por a yega na un mihor momento

163
0
SHARE
- Advertisement -

Minister Presidente Evelyn Wever-Croes:

ORANJESTAD (AAN) — Minister Presidente a subraya, den conferencia di prensa tocante e firmamento di MOU cu cual Aruba ta keda libera di e contrato cu Citgo, cu e noticia aki, cu riba su mes ta un hopi bon noticia, no por a yega na un mihor momento.

Esaki pasobra na e momentonan aki gobierno tin e presion di Hulanda, di CAft cu ta keda insisti cu mester bin cu mas medida, y hasta ta menaza cu aanwijzing. Apesar cu Hulanda ta admiti cu Aruba ta bayendo bon, cu ta cumpliendo cu e normanan toch nan ta keda menaza cu e tipo di aanwijzing aki, pensando cu talvez e otro aña Aruba no por cumpli cu e normanan.

“Pero nos ta diferencia di opinion. Gobierno di Aruba ta busca alternativanan pa cera e gap financiero, na lugar di solamente medida. Sinceramente mi ta compronde e presion cu Hulanda ta pone riba nos y nan ta referi na e preocupacion cu nan tin cu e debe halto cu Aruba tin di casi 90% di su GDP, y sinceramente, nos tur ta preocupa cu esey”, Prome Minister a remarca.

No obstante, e dignatario a expresa, no ta husto pa tuma medida riba lomba di pueblo, pa paga e debe aki cu ta gobierno anterior a crea y redobla, cu a causa hinca nos den problemanan financiero.

Minister Presidente ta keda lamenta e presion cu gobierno ta haya di parti di Hulanda y CAft, pasobra den e ocho añanan cu tabata tin un gobierno cu a haci y deshaci, cu a redobla debe, cu a tuma centenar di hendenan na trabao, nada a wordo haci. “Awor tin un gobierno drechi y responsable, cu ta tuma accionnan cu no ta ni popular, y e presion aki ta sigui toch”, e dignatario a expresa.

E preocupacion cu Hulanda ta demostra ta keda concentra den dos area: 1. E crisis plan social y gasto di personal. 2. Cu entradanan di belasting no ta bay cubri e deficit financiero.

E mandatario a splica un biaha mas pakico gobierno a scoge pa e crisis plan social ta den un fondo separa. El reitera cu gobierno ta pone e ser humano central y a subraya cu nan sa cu no tin problema na Aruba sino un explosion social. Pa por atende cu e explosion social aki, mester a pone fondonan un banda, pa e minister encarga cu e problemanan social por tin su tempo pa atende cu esey, mientras cu e demas ministernan ta atende cu e problemanan financiero di nos pais.

“Si nos a lague den un presupuesto e placa lo no a yega nunca pa atende cu e dolor social cu tin den comunidad” Prome Minister a señala.

El a expresa cu nan no ta hendenan cu ta papia un cos y ta haci otro, y pesey nan a pone e fondonan di plan crisis social apart.

Gobierno ta comparti e preocupacion di Hulanda tocante e gastonan di personal, y nan ta haciendo nan maximo esfuerzo pa cumpli cu e normanan y manera CAft ta bisa, tur cos ta mustra cu gobierno ta bay logre.

Tocante e di dos punto di preocupacion di Hulanda Prome Minister a indica cu nan tin razon pasobra no solamente belasting ta bay cubri e gap financiero, pa gobierno yega na surplus.

“Belasting a cubri e gap financiero pa gobierno yega na un presupuesto balansa, pero pa e surplus gobierno ta kere den alternativanan financiero y no medidanan. Pues esaki ta temanan masha importante pa no”, e dignatario a señala.

E dignatario a menciona cu riba tur e puntonan aki Hulanda y CAft ta pone presion riba gobierno, y gobierno no ta di acuerdo cu nan.

“Mi ta sigura tur ciudadano di nos pais cu nos lo bringa esaki si nos yega asina leu, pasobra pa nos ta importante pa sigui mustra cu nos ta cumpli cu nos normanan, pero nos ta pone e ser humano central, nos ta tene cuenta cu e dolornan cu tin den nos comunidad, y e hecho cu nos ta den proceso pa haya e yabi bek di e refineria, specialmente di e terminal no por a yega na un mihor momento y e bon noticia aki di e MOU ta yena nos cu e seguridad y speranza tambe cu nos ta bay yena e gap financiero cu desaroyo economico y no solamente cu belasting”, Prome Minister a reitera.

- Advertisement -

DUNA COMENTARIO

Please enter your comment!
Please enter your name here