Minister Rudy Lampe tocante mas innovacion den enseñanza:
ORANJESTAD (AAN) — Siman pasa un grupo di maestro a finaliza un tayer di trabao tocante e Filosofia Montessori y Minister di Enseñanza Rudy Lampe a anuncia cu e ta den full preparacion, pa otro aña cuminza cu e prome scol publico Montessori na Aruba.
E mandatario a splica cu e lo trece expertonan di Hulanda, pa prepara e educadornan cu lo wordo certifica como maestronan Montessori, pasobra nan ta kere cu e filosofia aki, cu ta basa riba educacion personaliza, ya cu cada mucha ta diferente y e sistema di enseñanza tin cu ofrece e mucha un educacion segun su ritmo, su talento y su capacidad.
Minister Lampe a comenta cu ya caba tin algun scol Montessori priva, pero mirando cu ya caba na otro paisnan tin scolnan Montessori publico, por ehemplo na Hulanda.
E metodologia Montessori ta hopi innovativo, y necesario pa por ofrece na e mayornan e derecho di scoge ki tipo di educacion nan kier pa nan yiunan, y Aruba tin cu diversifica su sistema educativo y pesey gobierno ta bay inicia tambe e Scol Publico Montessori Aruba.
Siman pasa a termina e prome tayer di trabao pero ta sigui mas pa prepara e maestronan.
Basa riba un pregunta, Minister Lampe a menciona cu e scol Montessori tambe ta parti di e proyecto SAM, y a comenta cu ya caba Hulanda a haci Aruba un donacion grandi di material didactico di e metodologia Montessori, cu por cierto ta un material financieramente costoso.
