Home General Ekipo cu a disparce tabata parti di fiesta cu placa di pueblo?

Ekipo cu a disparce tabata parti di fiesta cu placa di pueblo?

225
0
SHARE
- Advertisement -

Resumen

Mester determina cuanto placa a gasta pa shownan di gobierno anterior 

Cu gobierno anterior tabata sa con presenta show na pueblo, ta algo bon conoci. Ora mira atras riba presentacionnan di gobierno Mike Eman, ta parce cu no ta gobierno di un pais chikito den problema financiero tabata presenta nan mes, pero Sheik di paisnan cu placa di mas.

Rapportnan ta indica cuanto placa di pueblo a disparce na mal forma y con e debe a crece pa awe Aruba mira con e ta paga.

Na momento cu a bini cambio di gobierno na 2017, a bira conoci cu aparatonan costoso di gobierno a disparce. DIARIO a publica potret di mesanan caminda ekipo cu placa di pueblo a cumpra, mester tabata instala.

Investigacion a cuminsa. Autoridad a haci nan investigacion. Despues Ministro Presidente nobo, Evelyn Wever-Croes, a pidi pa personanan cu a bay cas cu ekipo di gobierno, debolbe e aparatonan.

Tin aparato cu a bolbe.

Den e investigacion un persona cu tabata liga na gobierno anterior, a wordo persigui y awe ta resulta cu no tin prueba cu el a bay cu ekipo loke ta haci cu autoridad mester stop cu e investigacion.

Nos ta laga na Husticia pa dicidi kico ta pasa den e caso aki y ta acepta pues cu no tin prueba pa persecucion.

Loke si hamas por acepta ta, cu exponentenan di gobierno Eman ta uza e ocasion aki pa lanta un furia mientras nan mes tin hopi pa splica pueblo pa loke ta trata fiesta cu tabata tin cu placa di pueblo.

Cifranan ta papia y pruebanan ta demostra pakico awa nos ta den problema serio dor di un gobierno incapaz, cu pueblo a manda cas.

Den caso di e aparatonan costoso cu mester a permiti exponentenan di gobierno anterior luci den nan presentacionnan, nos por ta corto.

Con por ta posibel cu aparatonan caso cu a cumpra cu placa di pueblo, por tabata na cas di hende ora gobierno Mike Eman a baha.

Mike no mester bin ataca husticia, pero Mike mester contesta pueblo kico el a haci cu placa di pueblo y kico el a permiti sosode. Mike Eman no mester lubida cu como Ministro Presidente, cu tabata su soño grandi ayera y awe, e mester a atende e asuntonan aki hasta si ta otro ministro a duna permiso.

Si por ehempel un fotografo a bay cu aparato pa saca potret, con por ta posibel cu hasta ora gobierno a cambia, ainda ekipo tabata na cas di trahado.

Pa nos no ta importante di cual partido kende ta. Pa nos loke ta importante ta e contesta, con por ta posibel cu sin permiso di e gobierno na mando a bay cas cu ekipo di gobierno, cu ta ekipo di pueblo.

Ta bon pa tur politico comprende awor tambe, cu no ta deber di pueblo pa mantene e imagen di politiconan. Pueblo no ta paga gobernantenan pa hunga artista, pero pa traha.

Mike Eman no mester lanta pueblo contra ningun instancia pa e fiestanan cu tabata tin cu placa di pueblo.

E mester simplemente para dilanti spiel y mira e realidad di e cara di e crisis actual di Aruba cu ta keda riba su consenshi!

- Advertisement -

DUNA COMENTARIO

Please enter your comment!
Please enter your name here