Preparando pa dia 2 di Mei 2020:
ORANJESTAD (AAN) – Den conferencia di prensa, Efrain Antonio, Productor di bolero di ayera, awe y semper, a hiba palabra.
E tin 20 aña caba ta productor di e musica aki, y den diferente oportunidad na su kerido Isla Aruba el a bin cu diferente show na varios hotel, y den Cas di Cultura y den presentacionnan estilo matinee of anochi pa enamoradonan y semper cu un exito rotundo.
Efrain Antonio a subraya cu den Cas di Cultura sigur, ta e lugar na unda a duna inicio na e show di boleronan ayera, awe y semper.
El a splica cu e motornan tras di e evento aki, na aña 2000, tabata entre otro Tico Quilotte, Robert Jeandor, Gerald Cross, y su persona mes. Nan a duna e evento aki un tiki curpa, sr. Efrain Antonio a expresa.
E evento aki a sigui crece y bira grandi te cu nan a yega awo te na Colombia. E proximo presentacion lo ta dia 2 di Mei 2020, representando Aruba na Colombia, door di invitacion di e Alcalde di Buga. Buga ta conoci pa su basilica El Señor de Los Milagros.
“Pa nos ta un gran honor di por sali representa Aruba y duna un presentacion di bolero na un pais cu mi ta considera, vooral e parti di Cali, cu ta e Meca di e musica Latino”, Efrain Antonio a expresa.
Na Cali ki sorto di musica cu ta Latino bay eynan y bo lo haya tur, musica cubano, salsa, bolero, son montuno, etc. Asina el a menciona.
E elenco cu ta bay representa Aruba na Buga, cu tabata hunto cu sr. Efrain, ta: Richard Quant (alias tattoo), Farita Luidens, cu ta cumpliendo 50 aña den e mundo farandulero, Hector Mario Quilotte (Tico), y Nilca Franca cu a recore rond mundo caba cu su voz, Sherwin Maria cu pa prome bez ta bay Buga pero cu ya caba a canta na diferente pais na mundo, Rachel Kraaijvanger y Efrain Antonio mes.
E grupo di musico aki a presenta e show aki pa binti aña largo, y nan lo sigui haci esaki en busca di reconocimento y di schouder propio, cu nan ta bin di un isla chikito y wordo invita pa un pais grandi manera Colombia.
Lo tin siete cantante di Aruba y siete di Colombia cu lo wordo acompaña pa e director musical Edgar Triana, cu lo forma un orquesta cu ta consisti di 13 musico, di gran calibre, cu tres trompeta, tres trombon y tres saxofon. E evento ta wordo organiza pa artista Bugueño, Jose Nedio, bao instruccion di e Alcalde di Buga.
E elenco di bolerista Arubano aki ya a participa cuater biaha na Colombia, na Barranquilla, Cartagena, Palmira Valle. Efrain Antonio a haci presentacion na Cali, y asina nan ta purba di infiltra unda e reconocimento y conocimento ta, y na unda nan ta wordo ricibi cu braza habri, como artistanan stranhero den un pais Latino, haciendo un bunita presentacion y e grupo ta masha contento cu esey.
