ORANJESTAD (AAN): Parlamentario Endy Croes ta felicita Minister Presidente Evelyn Wever Croes y gobierno di Aruba cu e logro unda a dal e promer pasonan firme pa cu e Refineria y Terminal.
Evelyn Wever Croes kende a lidera e negociacionnan hunto cu un team negociador a logra yega na entendimento. A logra firma un MOU unda Citgo lo debolbe Aruba e yabi di e refineria y terminal.
Despues di hopi luna di negosacionnan intensivo unda Aruba a keda aumenta e presion debi na incumplimento di Citgo pa cu e contract a logra yega na un entendimento.
Logro na fabor di pueblo:
Durante un bishita di Promer Minister na Washington e aña aki unda a reuni tambe cu OFAC (Office of Foreign Assets Control) a bira hopi mas cla cu Citgo no lo por bay cumpli cu e contract.
Aunke e contract cu Mike Eman y AVP a firma cu Citgo ta uno hopi desventahoso pa Aruba y ta beneficia Citgo grandemente, Promer Minister a keda persevera den negosacion pa finalmente sali cu un logro na fabor di pueblo.
Momento cu representantenan di Juan Guaido a tuma over rienda di PDVSA y pone nan hendenan den Citgo a alivia tambe e negosacionnan. Asina Citgo finalmente a admiti tambe cu nan no lo por cumpli cu e contract firma na 2016.
Firmando e MOU ta bira e promer fase cual lo bay determina e puntonan principal pa guia e proceso pa e traspaso final di e refineria, terminal y propiedadnan di Citgo back pa pais Aruba suspendiendo asina e acuerdo cu Citgo. Esaki ta permiti Aruba busca otro partnernan strategico tanto pa e terminal y pa e refineria.
Lo cumpli cu e trahador y contratistanan:
Un condicion fuerte di gobierno durante henter e negosacion tabata ta cu Citgo mester cumpli 100% cu su obligacion y debernan pa cu tur empleado y contratistanan. E punto aki a tarda e negosacionnan bastante como cu Minister President Evelyn Wever Croes no kier a ‘give in’ riba esaki saliendo di e punto di bista cu e ser humano ta central pa e gobernacion aki.
Asina Citgo a bay for di mesa algun biaha pero ultimo a logra convence nan cu sin e parti aki no lo firma e MOU. Contento finalmente cu e parti aki a worde acepta y ta forma parti di e MOU.
Cu hopi pasenshi y perseverancia y confianza den nos Promer Minister Evelyn Wever Croes y gobierno actual nos a dal e promer stap mirando luz na horizonte pa un salida elegante cu Citgo visualisando un futuro briyante den futuro cercano, Parlamentario Endy Croes ta finalisa bisando.
