Home Salud Enfermeronan a drenta den accion, pasobra nan ta haya cu e situacion...

Enfermeronan a drenta den accion, pasobra nan ta haya cu e situacion na hospital ta un desastre

112
0
SHARE
- Advertisement -

*Un deseo grandi ta pa saca e boiler for di e edificio

ORANJESTAD (AAN):  Diamars mainta e enfermeronan di Horacio Oduber Hospital a pone nan trabao abao durante 1 ora, den un accion di protesta riba e condicionnan di trabao bao di cual nan ta trahando.

Durante e ‘walkout’ prensa a entrevista Gina Maduro, presidente di e sindicato pa enfermero ABV, a splica cu despues di nan reunion general 8’or di mainta riba e negociacionnan di CAO, e enfermeronan a dicidi di tene un walkout pa demostra nan malcontento riba e trabaonan di construccion cu ta tumando lugar.

“Ultimo tempo miembronan ta cansa y fada di full e situacion aki”.

“E departamento di radiologia practicamente ta stagna y casi tur dia tin e mesun problema cu nan no por funciona”.

“Pashentnan ta wordo cancela pasobra no por duna nan servicio, tin problemanan structural y problema di diesel”.

Esaki segun Maduro, kende a indica cu nan no kier saca e boiler for di unda e ta.

“Nos a pidi SOGA pa saca e boiler for di e edificio aki, pasobra nos no mandabo hinca un boiler, mirando tambe e rapport negativo di DTI y Brandweer y tur otro conseho negativo”.

“Nos no kier soporta mas e holor di diesel, pues nos ta reta esnan di SOGA cu a bisa cu esaki no ta un problema”.

“Nos ta exigi pa nan saca e boiler for di e edificio”.

“Si e ta costa 800 mil mes pa saca, so be it”, presidente di e sindicato a bisa.

“Nos no por protesta dilanti di Parlamento, pasobra nos ta on call pa ora cu tin inundacion den hospital”.

“Ora esaki sosode nos tin cu bay mop y seca tur caminda y esey no ta nos trabao”.

Esaki segun Maduro, kende a indica cu tin un team cu ta 24/7 disponibel pa ora un tubo kibra etc., cu cualkier momento di dia mester bay hospital pa mop y seca cos.

“Esey a para bira nos trabao di enfermeria, esta seca vloer y mop”, segun Maduro.

Prensa a puntra e presidente di e sindicato kico mas ta bay sosode y el a splica cu nan ta bay manda un carta pa e instancianan concerni esta SOGA y na e minister encarga, pa saca e boiler afo y pa bin cu solucionnan mas lihe posibel.

“Nos ta duna nan un siman di tempo pa haya un contesta y si nan no reacciona e accionnan ta bay wordo aumenta”, segun Maduro.

- Advertisement -

DUNA COMENTARIO

Please enter your comment!
Please enter your name here