ORANJESTAD (AAN): Diaranson 2 di October 2019 a saca e ganadornan di e rifa di Facultad di Arte y Ciencia (FAS) na Universidad di Aruba (UA).
E meta di e rifa ta pa studiantenan financia un biahe estudiantil y paga na ticket, estadia y transporte. Pa logra esaki a busca premionan di comerciante local y a bende un rifa cu 29 premio.
E studiantenan di Social Work & Development (SW&D) ta biaha pa Costa Rica y e studiantenan di Organization, Governance, and Management (OGM) cu ayudo di entro otro Minister Plenipotenciario Joselin Croes na Embahada Hulandes ta bay Washington DC.
E meta di e biahenan aki ta pa stimula e studiantenan pa aspira pa sigui studia (pa un Masters), pa nan haya experiencia internacional y amplia nan perspectiva teoretico.
E prome premio a bay pa Gamma IT Solutions cu a gana cu number 03599. Na di dos luga a gana Mayto van der Linde cu number 02829 y na di tres luga a sali S. Arends cu number 03168.
E otro ganadornan por mira riba e lista poni riba e pagina aki di DIARIO.
E docentenan y studiantenan ta gradici tur persona y compania cu a contribui por medio di donacion, premio pa rifa of cu a cumpra rifa.
Pabien ta bay na tur ganador. Por busca e premionan otro siman Diahuebs 10 di October 2019 pa 4or di atardi den Aula di Universidad di Aruba. Por fabor bin reclama premio cu e ticket ganador y cu un identificacion valido.
