ORANJESTAD (AAN): E ta algo cu semper ta pasa ora di construi un caretera den un zona unda no ta conoce completamente cua ta e puntonan ‘mas abao’ y cual area ta mas probable di bira victima di inundacion.
Esaki ta e resultado di no conoce e caminda cu e awa sa pasa, ora tin awacero. Y como cu e isla aki a pasa den hopi luna di secura, claro cu no por a anticipa e problemanan di drenahe.
Pesey mes ora cu algun luna pasa tabatin inundacion rond di rotonde di Cumana cerca di ex-Codemsa, a cuminza traha mesora pa fix e drenahe. Y e trabaonan haci a reduci e inundacion basta bon.
Tambe a descubri con na e rotonde nobo cerca di Cas Casuela tambe tabatin area di plas grandi. Mesora e contratista a traha y esaki a wordo regla basta bon. E inundacion a keda hopi reduci.
Awor ta riba e pida caminda nobo di Watty Vos Boulevard entre rotonde Ponton cerca di Wing Hung Restaurant y tambe rotonde cerca di Cas Casuela. E awacero pisa di Diabierna madruga, a crea un plas gigante.
DIARIO a haya sa cu mesora tanto personal di DOW como tambe e contratista Mota-Engil a bay check y evalua e situacion, y tin indicacion cu a traha plan caba con pa bay fix e problema di drenahe aki.
Pues aki tambe na Ponton tin di bay traha riba drenahe pa reduci plasnan asina. Algo similar tin di socede tambe na e rotonde cerca di Ling & Sons, unda tin di conecta tuberia pa laga e awa core bay pa e drenahe cu tin cerca di rotonde di Guardian Group Fatum.
Tambe lo tin di fix e drenahe na altura di e rotonde nobo di Noord. Aki na forma inespera tambe tin un dam net pabao di ex-Warda di Polis. Aki tin di bay pone tubo pa laga e awa core y yega na e rooi cu tin net panort di Misa di Noord.
