Home Cultura Ewald Biemans a gana premio ‘Phoenix Award’ di e prestigioso compania ‘Society...

Ewald Biemans a gana premio ‘Phoenix Award’ di e prestigioso compania ‘Society of American Travel Writers’

188
0
SHARE
- Advertisement -

ORANJESTAD (AAN): Ewald Biemans, doño/CEO di Bucuti & Tara Beach Resort e siman aki a keda encanta cu su premio sorpresa ‘Phoenix Award’ di e prestigioso compania ‘Society of American Travel Writers (SATW).

Funda na 1955, e meta di e grupo aprecia aki ta pa inspira biahamento a traves di periodismo responsabel. Su miembronan ta inclui mas cu 1000 escritor di biahe, fotografo, editor, productor di noticia/video/film, blogger, experto den relacion publico y representante den industria di hospitalidad di Merca y Canada.

E premio ‘Phoenix Award’ ta e reconocemento di mas halto di SATW otorga na individual, negoshi, organisacion y comunidad, cu a un demostra esfuerso excepcional pa preserva, conserva y embeyece of proteha e recursonan historico, cultural y natural di un area.

E resultadonan tangibel aki ta engrandece e herencia economico, socio cultural y/of beneficio di medioambiente pa e destinacion y su balor pa turismo.

Dialuna ultimo, durante e convencion anual di SATW na El Paso, Texas, nan a anuncia e nominadonan pa e aña aki. Biemans tabata e unico individual entre e tres ganadonan. Su liderazgo pa dirigi Bucuti & Tara pa bira e prome y unico hotel cu certificacion carbon neutral den Caribe, tabata e broche di oro durante e evento.

Na 1969, hopi prome cu e palabra ‘eco turismo’ a bira e palabra magico, SATW a crea un premio pa reconoce e esfuerso di conservacion y preservacion rond mundo.

Cincuenta aña despues, e miembronan di e Sociedad a sigui nomina individual, comunidad y organisacion cu a contribui na un experencia di biahe di calidad, door di nan conservacion, preservacion y embeyecemento of esfuerso ambiental.

“E hunta di Directornan di SATW ta orguyoso di duna honor na tres ganado excepcional e aña aki,” tabata palabranan di David Swanson, Presidente di SATW.

“Mi ta sorprendi y berdaderamente agradecido pa wordo honra cu e premio ‘Phoenix Award 2019’, otorga door di e profesionalnan dedica di e ‘Society of American Travel Writers’,” Ewald Biemans, doño/CEO di Bucuti & Tara Beach Resort ta comparti.

“Particularmente mi ta gradicido na e escritor Bob Curley, kende a nomina mi y pa tempo largo caba a yuda comparti e storia di Bucuti y di Aruba rond mundo.

- Advertisement -

DUNA COMENTARIO

Please enter your comment!
Please enter your name here