Home Parlamento FADA y Fact Team ta dos entidad crucial den e Social Crisis...

FADA y Fact Team ta dos entidad crucial den e Social Crisis Plan pa preveni y combati uso di droga

73
0
SHARE
- Advertisement -

Cu programanan dirigi na e hoben:

ORANJESTAD (AAN) – E Parlamentario di fraccion di MEP Hendrik Tevreden, den un entrevista cu DIARIO a trece dilanti, cu e fraccion ta trahando hopi duro riba e tema di adiccion cerca nos hobennan.

E parlamentario a declara cu no obstante, apesar cu un persona a scoge pa uza droga, mester tene cuenta cu e derechonan humano y cu tin cu respeta pa ley e decision di e persona pa ta un adicto.

Sinembargo hopi trabao ta tumando lugar riba e tereno aki, y  e como parlamentario tin e anhelo y gana di haci hopi mas.

Parlamentario Tevreden a uza e oportunidad pa felicita FADA cu ta bay drenta den su “National Week of Red Ribbon”, unda na un manera hopi creativo nan tin nan campaña di concientizacion pa e hobennan riba abuso di consumo di droga y su consecuencianan dañino.

E aña aki e tema ta: “Send a message stay drug free” cual sigur Parlamento ta apoya cien por ciento y ta para su tras.

Tocante kico Parlamento ta haciendo, Tevreden a subraya cu dentro di Fondo di e Social Crisis Plan cu Gobierno a introduci for di 2017, e parti di Salud Mental ta wordo trata, y e ta kere cu esaki ta e lugar corecto; y e ta inclui drogadiccion tambe.

Kiermen Salud Mental y Drogadiccion ta bin hunto pa haya un atencion special den e kader aki di Social Crisis Plan.

E parlamentario a trece dilanti cu, manera ta conoci, e social crisis plan ta un fondo di 34 miyon florin cu Parlamento, den su mayoria, a aproba y e ta parti den un periodo di dos aña.

Den e fondonan aki Parlamento a pidi e Minister pa pone special atencion cu e parti cu ta concerni specialmente e hobennan, y abuso di droga, pa concentra riba FADA. FADA ta inclui den e Social Crisis Plan pa nan duna training na su personal, pa sigui cu e programa di B-Smart. Esaki ta un programa hopi elabora riba con pa modifica e conducta cu ta hiba na adiccion.

Esaki ta hopi importante vooral ora e hoben ta den su adolescencia pa e por compronde kico ta e scogencianan cu e por haci, por ehemplo ora ta trata di gambling, droga, videogames, cu ta afecta e hobennan principalmente.

E parlamentario a splica di con e programa B-Smart ta enfoca riba conducta. Esaki ta debi cu e tin di haber cu presion di grupo y di otro factornan externo y kizas den e famia mes. Y ora cu e momento crucial yega pa e hoben (ya cu ta un hecho cu mayoria di adictonan a cuminza uza droga den nan hubentud), ya e ta bon ekipa pa bisa no y con e por maneha e presion cu tin riba dje.

Tevreden a sigui bisa cu tin proba cu ora mayornan ta papia regularmente cu nan yiunan tocante droga, mas cu 40% sigur lo no uza droga.

Pesey mayornan mester enfoca cada bez cu nan haya un chens, na papia cu nan yiu tocante consumo di droga y e consecuencianan cu esaki ta trece cune.

Den e situacionnan aki e Fact Team ta hunga un rol crucial, pa limita e daño riba e generacion cu ta bin.  E Fact Team tin e personal specializa pa atende cu tin e tendencianan psiquiatrico pero cu na mesun momento ta uza droga.

Parlamentario Tevreden a señala cu akinan atrobe tin e dilema di kico a bin prome? E malesa psiquiatrico of e uso di droga? Si ta door di consumo di droga e malesa psiquiatrico a bin; of pasobra e tin malesa psiquiatrico e ta uza droga. Mundo no a sali ainda for di e contesta pa e pregunta aki.

En todo caso, Fact Team ta atende e hoben na su cas, den su mesun ambiente, y ta hiba combersacionnan regularmente cune dunando e terapia y formanan con pa yuda e hoben crece den balansa cu e dos problemanan menciona, y cu tempo por concientiza riba e parti di maluso di droga.

- Advertisement -

DUNA COMENTARIO

Please enter your comment!
Please enter your name here