ORANJESTAD (AAN): E tabata un momento di panico Diahuebs anochi pa un famia cu ta biba na Tanki Leendert, un tiki panort di e area di Solito.
E famia a caba di yega cas, danki na un lift cu nan a ricibi. Nan a baha di auto, y tabata gradiciendo e persona pa e lift, ora cu diripiente uno di nan su wowo a cay riba e Postbus cu tin poni pafo na e porta di cura.
“Mi a mira manera comosifuera cu Post Aruba lo a pone un pakete diki den nos Postbus,” e dama a declara den un entrevista exclusivo cu DIARIO. Banda di nan cas no tin luz di caminda, pues Diahuebs tabata un tiki scur.
Ta bon mes cu e no a hinca man den e Postbus e momento ey, pasobra e lo por a empeora e situacion!
El a bin ripara cu tin algo bibo den e Postbus, ora el a mira manera e tapadera su so ta bay halto. E ora e persona a tira mihor bista, y a bin ripara cu ta un reptil tin eyden.
“Na e lineanan riba su curpa mi por a realiza cu e ta un Boa,” e dama a indica na DIARIO. El a mira con e Boa a cuminza move.
“Mi a dal un grito masha duro mes, y kizas esey a pone e Boa cuminza move”.
E famia no tabata sa kico pa haci, pasobra keto bay nan ta para pafo banda di caminda. Nan no por drenta nan cura di cas cu e reptil ey ta strobando nan entrada.
E gritamento a pone cu e persona cu a caba di baha nan na e cas, a dicidi check kico ta pasando. El a ripara mesora cu ta trata di un Boa.
E chauffeur pa suerte tin un aparato cu yama “The Club”. Esey ta un lock/candal special pa bo pone na bo stuurwiel pa stroba ladron di horta bo vehiculo.
E aparato ey tin un pida den forma letter U na final, y esey el a usa pa asina wanta e cabez di e Boa. E momento ey e Boa a cuminza purba ataca tambe. Pero e chauffeur na un forma tactico, calmo, y cu precision a usa e otro pida tubo di The Club, el a cuminza bati riba cabez di e reptil.
Di e forma ey a mata e Boa aki cu por poco lo por a causa daño, si acaso e dama of cualkier mucha a hinca man den Postbus. Pasobra e Boa a logra habri e tapadera pa asina busca refugio den dje. Riba e potret aki por mira con e Boa a hasta manera cera e tapadera bek.
Aki DIARIO a puntra e dama, si kizas ta hende cu mente maligno lo por a pone e reptil den e Postbus? E dama a bisa cu esey no ta e caso. Pasobra el a bay wak despues su Security Video Camera, y el a descubri cu ta e Boa mes a cuminza subi e porta di cura, lorando via e tralinan, y despues a drenta e Postbus.
