ORANJESTAD (AAN): Un publico grandi tabata presente Diasabra anochi den Centro Caiquetio na Paradera, pa asina presencia e Festival di Ranchera a la Grande.
E evento di musica ranchera tabata pa escoge un “Rey de la Cancion Mexicana”, y tambe “Reina de la Cancion Mexicana”.
DIARIO a nota cu e Festival aki a wordo dedica na Miguel van der Linde.
E solo hecho cu Centro Caiquetio tabata yen di hende, ta demostra cu pueblo di Aruba keto bay ta un gran amante di musica di ranchera. Y e sonido di Mariachi tabata perfecto henter anochi. Tur comentario cu por a tende, ta cu e Festival aki tabata di un nivel basta halto.
Mariachi Perla di Aruba a acompaña 30 cantante e anochi aki, y sigur cu cada uno a demostra nan habilidad unico riba escenario, y cu dominio di nan voz.
Na final, e ganador absoluto di “Rey de la Cancion Mexicana” a bira Fermin Campo.
E ganadora absoluto di “La Reina de la Cancion Mexicana” 2019 a bira Suriany de Mey.
E demas ganadornan di e Festival den categoria Cabayero ta:
Di 2 lugar ta Jason Kelly. Di 3 lugar ta Sidney Simoons. Di 4 lugar ta Mario Kelly Jr. Di 5 lugar ta Jaime Robles de Medina.
Den categoria di Damas, e ganadornan ta como lo siguiente:
Di 2 lugar ta Olga Tromp. Di 3 lugar ta Katharine van der Linde. Di 4 lugar ta Michaelle Thijsen. Di 5 lugar ta Julisa Hoevertsz.
