Caso di Computernan di Gobierno
ORANJESTAD (AAN): Den fin di siman cu a pasa, Fiscal di Ministerio Publico a dirigi un carta pa e conocido periodista local Marko Espinoza, unda cu e ta informe cu Ministerio Publico lo no persigui nada mas den e caso relaciona cu e supuesto ladronicia di Computer y demas equipo di trabao, ora cu Gobierno a cambia na December 2017.
Marko Espinoza durante Gobierno di AVP tabata traha den Departamento di Prensa. Ora cu Gobierno a cambia, nan a entrega keho contra dje di a horta equponan cu lo ta supuestamente pertenece na Gobierno. E mesun luna ey, el a wordo aresta y encarcela.
Awor na October 2019, Fiscal ta bise cu ta “seponeer” e caso cu tin contra dje. E carta cu a wordo entrega na Marko Espinoza a splica cu lo no persigui mas, debi cu no tin suficiente prueba.
E carta firma pa Fiscal mr. T. Akkerman por wordo analiza for di diferente perspectiva, y hopi observador ta pensa cu simplemente Ministerio Publico lo no kier bay den wega di persecusion politico. Posiblemente a analiza tur e declaracionnan contra Espinoza tambe, y a conclui cu e pruebanan presenta door di Gobierno contra Marko, no ta suficiente.
Lo mas lamentable ta cu Marko Espinoza si a keda encarcela seis dia largo den cel pa e acusacionnan sin base aki. Tin chens cu e por entabla un caso civil pa posible daño y perhuicio contra dje.
