ORANJESTAD (AAN): E siman aki, DIARIO tabata den Parke Nacional Arikok y a tuma nota cu den un rato di ora, bo ta sinti e trankilidad y por goza di bunita bista di flora y fauna.
Y algo cu a tuma nota, ta cu den parke mes na algun lugar, a traha algun scalchi cu ta yena cu awa, y di e forma ey parhanan por haya lugar pa bebe.
Net e momento ey fotografo Hubert Tiel di DIARIO a tuma nota, con un Gonzalito tabata disfruta un mundo di e awa den scalchi aki. Ademas di bebe e liquido precioso aki, el a probecha di e ocasion pa asina baña su curpa den dje.
Super bunita mes tabata e momento aki!
E dianan aki cu ta hopi calor na Aruba, ta recomendable pa pueblo pone bakinan limpi cu awa aden pa asina Paloma, Buladeifi, Totolica, Mofi, Blenchi, Prikichi, y demas parha por haya awa.
No kere cu pasobra awa a yobe mainta, cu merdia e parhanan aki ta haya awa ainda. Pasobra awa ta wordo absorba door di tera, y tambe evapora hopi rapido, pues merdia no tin awa mas pa nan bebe.
Por fabor no laga e bakinan di awa hopi tempo sin haci nan limpi, pasobra sangura por usa nan pa pone webo, y esey lo trece otro dolor di cabez.
