Home General FPNM ta enfoca riba señalnan di termento cu mayor mester tene cuenta...

FPNM ta enfoca riba señalnan di termento cu mayor mester tene cuenta cune

86
0
SHARE
- Advertisement -

Termento ta algo hopi serio

ORANJESTAD (AAN) –  Felishah Posner, Consehero Pedagogico di Fundacion pa Nos Muchanan, den entrevista cu DIARIO relaciona cu un charla cu FPNM a duna den cuadro di e Luna Nacional di Prevencion di Bullying, a señala cu no solamente e victima di termento mester haya ayudo, pero tambe e terdo.

E mucha cu ta ter mester di atencion, sosten y yudanza tambe, pa nan por cambia di comportacion. El a enfoca tambe riba e señalnan di termento cu mayornan mester tene cuenta cune. 

SEÑALNAN DI TERMENTO:

Sra. Ponson a indica cu hopi mayor ta puntra, con nan sa si nan yiu ta wordo geter na scol.

El a splica cu un di e señalnan ta ora e yiu no kier bay scol mas. Por ta un mucha cu semper ta gusta scol diripiente e no kier bay mas.

Esaki por indica cu e mucha a pasa den algo desagradable na scol, y ta hopi importante pa e mayor bay wak kico ta e motibo cu su yiu no kier bay scol.

Otro señal ta cu e ta hopi su so na scol, e no tin hopi amistad eynan. E motibo por ta cu e ta wordo geter.

Tambe ora e mucha ta bin cas cu material di scol cu e mayo a cumpra pe, kibra. Of si e ta bisa cu el a perde. Esey por indica cu na scol nan ta horta su cosnan of nan ta kibre.

Tambe si e mucha ta keda di dolor di barica, dolor di cabes, of si diripiente e ta cuminza urina na cama atrobe. Tambe si e mayor ripara cu e mucha ta yora hopi anochi, sin motibo, specialmente Diadomingo anochi cu e tin cu prepara pa Dialuna bay scol bek. Of si ripara cu e yiu tin hopi miedo y e ta hopi insigur.

 

TERMENTO TA SERIO:

Sra. Ponson a subraya cu ta importante pa tur hende ta conciente cu termento ta algo serio y cu e tin su consecuencia pa ambos: e terdo y e victima.

E VICTIMA: E victimanan di termento nan imagen propio ta hopi abao, anto nan por desaroya rabia riba hopi hende, nan por sufri daño emocional te cu nan ta bira depresivo, hasta por comete suicidio. E consecuencianan di termento por persisti te ora e victima bira un adulto. Pesey e ta algo hopi serio.

E TERDO: Pa mucha cu ta un terdo pa un tempo hopi largo, sin cu un hende stop nan of cambia nan comportacion, e posibilidad tey cu nan por bay den criminalidad, abuso di consumo di alcohol, etc.

Pesey, sra. Ponson ta reitera, ta hopi importante pa para e comportacion di e terdo no solamente na beneficio di e muchanan cu ta wordo geter, pero tambe na beneficio di e terdo.

Mayornan cu ta interesa na haya mas informacion FPNM tin hopi mas pa duna y por yama na nan telefon of via facebook page.

Contestando un pregunta, finalmente Ponson a splica cu Telefon pa Hubentud a yega di haci un estudio tocante e consecuencianan di termento na Aruba, pero FPNM no tin e resultado di esey. No obstante tin indicacion di algun caso di intento di suicidio, pero di e tema aki no ta wordo papia mucho y por ta cifranan por mustra chikito riba papel, pero por ta tin mas caso scondi cu no ta wordo papia di dje.

 

- Advertisement -

DUNA COMENTARIO

Please enter your comment!
Please enter your name here