ORANJESTAD (AAN): Recientemente Fundacion Respaldo a tene un rueda di prensa den Hofi Shon Shoco pa anuncia diferente proyecto pa e luna di october.
Ta asina cu luna di October ta un luna hopi importante pa salud mental mirando cu dia 10 di October a wordo declara como e dia mundial pa salud mental.
E aña aki e focus pa cu e dia aki ta prevencion di suicidio. Dr. Hendrikus van Gaalen ta splica cu esaki ta un topico cu ta importante pa focus riba dje.
Na mundo e ta un problema grandi si wak cu na mundo cada 40 seconde un hende ta comete suicidio. Na Aruba lastimamente falta cifra concreto pa por conclui con e situacion real ta na Aruba. Pesey e ta keda importante pa bin hopi concientizacion over di e tema aki y pa por reconoce ora un hende tin necesidad di ayudo.
Respaldo kier a hasi algo cu e tema aki pa por trece mas concientizacion pa salud mental en general y suicidio en especial. Asina a yega na e idea di hasi algo den naturaleza mirando cu esaki ta haci nos sinti bon.
‘Sunrise Hiking for Mental Health’
A acerca Parke Nacional di Aruba cu a resulta di tambe tin un idea similar di hasi algo cu mindfulness y hiking den e parke. Esaki a resulta den e promer ‘Sunrise Hiking for Mental Health’. Esaki lo ta tuma lugar diadomingo awor 13 di October.
Pa 6.30 di mainta ta sali for di Hofi Shon Shoco bay Cunucu Arikok , Cero Bonchi, Cero Arikok, Rooi San Fuego y caba bek na Hofi Shon Shoco. Mey mey di e ruta lo para riba e cero pa aprecia e salida di solo. Pa participa por inscribi via e Facebook page of por manda un e-mail na info@respaldo.aw.
Pa paga e contribucion di Afl. 5,00 pa mayornan di 18 aña por pasa na Baz-RRR Galeria & Brasserie situa na Emmastraat 3. Si no ta logra por paga e contribucion ainda diadomingo entre 6’or y 6’or y mey.
Fundacion Respaldo ta spera di conta cu pueblo completo di Aruba pa bin sostene e concientizacion pa cu suicidio y Salud Mental. Ademas esaki ta un bon oportunidad di disfruta Aruba su naturalesa den nos Parke Nacional.
Splash and Dash car wash
Tambe den luna di October Respaldo a wordo escohi door di Splash and Dash car wash pa ta e fundacion cu lo forma parti di nan Care to Wash Community program. Durante full e luna di October pa tur hende cu hasi un ‘Dushi wash’ y simplemente mencion e ‘Care to wash community program’ Splash And Dash carwash lo hasi un donacion pa Fundacion Respaldo.
E dushi wash ta consisti di e labado di e exterior di bo auto, bou di e chasis, rinse y seca pa 19 minuut. Tur esaki sin cu bo tin cu baha di bo auto y den menos cu 10 minuut bo ta keda cla. Splash and dash ta situa patras di KFC na Sasakiweg (of awor Avenida Nelson Oduber).
E yamado pa Aruba ta pa pasa hasi bo dushi wash e luna aki y contribui cu Fundacion Respaldo. E obhetivo ta pa cu e fondonan cumpra coi hunga pa e policlinica nobo pa mucha y hoben cu pronto lo habri na Mahuma.
Mudamento di Fact-Teams
Dr. Van Gaalen ta splica cu den e luna di October lo muda e dos FACT-teams di Respaldo pa e edificio nobo cu ta idealmente situa na un localidad hopi central na Aruba.
Siguientemente lo muda e policlinica pa adulto como tambe e policlinica pa mucha y hoben pa e edificio nobo aki.
Di e manera aki Respaldo cuminsa duna servicio policlinico y ambulatorio for di Oranjestad tambe.
