Reaccion Rocco Tjon ta haci acusacion Melvin Tromp cuestionabel
*Servicio di Siguridad a screen Rocco Tjon na dos ocasion
*Segun Tjon AVP kier desvia atencion di casonan di corupcion
ORANJESTAD (AAN)– Despues cu e miembro di Parlamento pa AVP, Melvin Tromp a lansa acusacionnan serio contra Rocco Tjon, DIARIO a ricibi e siguiente comunicado.
“Nos ta desaproba e actitud maligno di Mike Eman caminda e kier desvia atencion di caso “avestruz”. Un investigacion penal conduci riba (1) soborno (2) labamento di placa (3) mal uza funcion como gobernante (4) estafa. Esaki ta e “legacy” di Mike Eman y e resultado di su liderazgo”, asina parlamentario Rocco Tjon a declara.
ARTHUR DOWERS Y ROBERT CANDELARIA
Ta condenabel tambe cu pa desvia atencion partido AVP ta sali awo y cuestiona y of insinua cosnan riba mi persona den un caso personal y civil di 2010. Manera nos a splica caba un aña pasa, partido AVP por haya tur detaye di e caso aki cerca Arthur Dowers y Robert Candelaria.
Falta di caracter y liderazgo di entre otro e dos personanan aki, cu a labora den e aparato hudicial ta e unico cos cu e atakenan baho y vil aki ta subraya.
SCREENING
Bou di Mike Eman y Arthur Dowers mi a wordo gescreen door di “Veiligheidsdienst” di Aruba y Merca na 2014 pa atende FBI-academy y na 2016 un bes mas door di Veiliheidsdienst di Aruba pa asumi e funcion di director di KIA.
E caso civil aki ta forma parti di e screening kiermen cualkier informacion cu partido AVP of nan simpatisantenan kier di mi, nan sa cerca ken nan mester ta.
Hunto cu e articulo aki mi ta publica e resultado di mi screening haci bao liderazgo di Mike Eman. Y tambe mi ta publica mi nombramento door di Gabinete Mike Eman.
Manera mi a bisa na varios ocasion, e tipo di atakenan aki hamas lo silencia mi. Y awor aki mas motiva mi lo sigui haci mi trabou pa ta di balor agrega. Y trece actonan coruptivo pa dilanti y condena mal practicanan.
Realidad ta cu e “legacy” di Mike Eman ta cu e a haya un KB pa “mal gobernacion” y su liderazgo a conduci na actonan coruptivo den su gabinete manera señala den caso “Ibis” y caso “avestruz”.
Te asina leu e reaccion di Rocco Tjon riba e acusacionnan di Melvin Tromp contra su persona.
