Minister Bikker tocante di SPA:
ORANJESTAD(AAN): Diahuebs durante un conferencia di prensa, Minister di Husticia Andin Bikker a reacciona riba e hecho cu sindicato di polis SPA a anuncia cu nan ta bay tene un welga cortico di 1’or di merdia awe te cu 3’or di atardi.
E mandatario a indica cu el a manda un invitacion pa SPA reuni cune Diahuebs mes, pa e tende nan preocupacionnan.
“Mi a tuma nota cu nan a indica cu nan kier scucha un reaccion di Gobierno, prome cu nan drenta den accion y sigur nos kier sinta cu nan”.
Esaki segun Bikker, kende a bisa cu e kier splica e raiz di e problema, pasobra e tin comprension pa sindicato SPA y tur otro sindicato den union, cu tin un preocupacion riba e tema di indexering.
“Na mes momento nos a sinta cu coleganan minister den varios reunion, pa splica nan cu ta trata aki di un problema hereda”.
“Gobierno anterior den menos di 8 aña di gobernacion a redobla e debe di pais Aruba y esey ta pone cu nos ta pagando un average di 234 miyon florin na interes, cu no ta bin bek den nos economia”.
“Den e proceso aki partido AVP no a percura pa pone e ser humano central y percura pa indexering di e miembronan di tur e sindicatonan aki”.
“Esey ta pone cu nos ta haya nos mes den un situacion hopi fastioso”.
Esaki segun e mandatario, kende a sigui bisa cu e reto ta grandi, pa loke ta determina con hopi e espacio ta pa dedica parti di bo entrada na gastonan di personal.
“Tin promesanan cu a wordo haci durante gobernacion anterior cu no a wordo cumpli cune y awor e gobierno nobo tin cu atende cu esaki”.
“Nos mester compronde y tur hende mester realiza con nos a hereda e pais y kico ta e retonan cu nos tin”, segun Bikker, kende a indica cu tur politico lo kier ta esun cu ta djis paga e indexering etc., pero mirando e situacion mester busca e mihor manera pa atende cu esaki.
“Pesey un apelacion di mi banda lo bay na SPA, pa nos keda sinta na mesa pa busca solucionnan pragmatico pa e situacion aki”.
“Gobierno na final di dia siguramente como bon doño di trabao kier cumpli cabalmente cu su empleadonan, siempre y cuando den e espacio y cuadro financiero, na un manera responsabel”, segun Bikker.
