Gobierno Mike Eman a comete un crimen contra Aruba

Analisis 

Parlamento mester investiga daño total di su maneho 

Na nomber di Reino el a palabra bon maneho di placa

Dia 21 di April 2016 como representante di Reino Hulandes, Mike Eman a presenta dilanti Nacionnan Uni na nomber di tur pais den Reino manera e mes a splica den e reunion.

Tema di e intervencion di Mike Eman tabata e plan di Desaroyo Sostenibel di Mundo di Nacionnan Uni.

Na varios ocasion nos a presenta e plan di desaroyo mundial na lectornan. Ta trata aki di un meta comun di Nacionnan Uni pa na 2030 alcansa un miho mundo na bienestar di tur hende.

Na fin di 2018, Algemene Rekenkamer Aruba cu ta encarga cu e control financiero di Aruba, a presenta su participacion den control di e plan di Nacionnan Uni tambe debi na e hecho cu Aruba a mara su mes na cumpli cu loke e plan aki ta encera pa asina alcansa felicidad di hende.

Di e forma aki e consehero oficial di Parlamento di Aruba, a mustra cu gobernacion mester por cumpli cu contenido di loke a wordo acorda den Nacionnan Uni.

Algemene Rekenkamer Aruba no a laga luga na duda, con importante un bon maneho financiero di Aruba ta pa e pais por cumpli cu e meta di e plan di Nacionnan Uni. Riba tur tereno e hende mester por ta feliz y e pais mester tin e recursonan pa haci esaki.

Na momento cu Mike Eman a dirigi palabranan bunita na Nacionnan Uni, e tabata sa cu ya el a hinca Aruba den un situacion cu lo no tabata permiti pa Aruba ehecuta loke tin den e manifiesto comun pa bienestar di hende rond mundo.

Na momento cu Mike Eman tabata dirigi palabra na Nacionnan Uni, e tabata tin Aruba completamente den gara di e proyecto di Citgo, cu lo a bira e instrumento pa kibra restructuracion economico di Aruba cu tabata necesario na 2015 pa Aruba por tabata tin fondo pa yega na un maneho na interes di pueblo.

Mike Eman tabata na haltura na 2016 ora e tabata papia cu Nacionnan Uni riba e forma cu un gobierno mester hiba y bon maneho duradero pa e pais, cu ya el a destrui Aruba cu su maneho financiero.

El a comete un crimen contra Aruba, cu a perde e poder financiero pa traha riba un futuro cu casi ya a muri ora e tabata na careda na 2016 pa trece Citgo.

Rapportnan oficial ta mustra con logro politico tabata e obhetivo mas grandi di gobierno  Mike Eman y awe Parlamento tin e deber pa saca Aruba for di tur duda.

Parlamento mester pidi yudansa di Algemene Rekenkamer Aruba pa e por yega na un conclusion di e totalidad di e crimen cu gobierno Mike Eman a comete contra Aruba caminda awe no tin placa pa nada.

Placa importante pa desaroyo nacional y di e ciudadanonan ta den brug, tram, fietspad, tur puzzel financiero y e restonan mortal di e proyecto Citgo.

Awe e dolor di pueblo di Aruba ta exigi Parlamento asumi su responsabilidad y splica pueblo cuanto placa di pueblo a wordo uza pa destrui bienestar di Aruba, cu awe ta rehen di debenan cu pueblo mester placa no cu orguyo pero cu e berguensa di tabata tin Mike Eman como lider di gobierno.