Minister Rudy Lampe:
ORANJESTAD(AAN): Minister di Enseñanza, Ciencia y Desaroyo Sostenible Rudy Lampe Dialuna a pidi hobennan den nos comunidad pa keda pendiente di e Job Fair cu ta bay tuma lugar e siman aki.
“Tur hoben cu ta interesa pa inicia un carera militar, ta bay haya tur informacion necesario”.
“Ministerio di Defensa di Hulanda ta bay ta presente pa duna informacion”.
“Awe nan ta bay ta na Santa Theresita Center na San Nicolas, Diaranzon 30 di October nan ta bay ta na Centro Deportivo Betico Croes na Santa Cruz y Diabierna nan ta bay ta na EPI na Seroe Blanco”.
Esaki segun e mandatario, kende a sigui bisa cu e 3 dianan aki practicamente henter dia lo duna informacion.
“Parti mainta di 9’or pa 1’or e hobennan cu tin un diploma caba ta haya informacion, mientras cu esnan cu ta bayendo scol ainda ta haya informacion di 2’or pa 6’or”.
“Tin un oportunidad tambe pa e mayornan haya informacion riba e posibilidadnan pa nan yiunan sigui un carera militar y esey ta di 7’or pa 9’or di anochi”.
Esaki segun Lampe, kende a sigui bisa cu esaki ta un oportunidad nobo pa nos hobennan.
E mandatario a splica cu despues cu el a bira minister di educacion, e ciudadano Glen Rock a acerke pa papia riba e posibilidad pa hobennan sigui un carera militar, mirando cu den pasado na Hulanda el a haci esaki y ta haya cu esaki ta brinda hopi oportunidad.
“Nos ta hopi agradecido cu el a bin dilanti cu su testimonio, bisando cu e mes a probecha di un formacion militar na Hulanda”.
Esaki segun Lampe, kende a indica cu despues di ricibi tur e informacion for di Rock, a tuma contacto na diferente occasion cu representacion di gobierno di Hulanda aki na Aruba y tambe cu Directie Onderwijs.
Na Arubahuis Nuris Dabian a haci un tremendo trabao di contacto cu Ministerio di Defensa y nan a tuma e iniciativa, unda cu e siman aki nan ta bay ta presente.
“Si bo ta interesa den Marina, Luchtmacht, Marechaussee etc., awor bo tin e oportunidad pa haya tur informacion”, segun Lampe.
