Home Hudicial Homber haya cu plantacion di 136 mata di marihuana dilanti Hues

Homber haya cu plantacion di 136 mata di marihuana dilanti Hues

120
0
SHARE
- Advertisement -

ORANJESTAD  (AAN) – E homber A.M. acusa di entre 28 October 2018 y 28 December 2018 tabatin plantacion di marihuana, ayera mainta a admiti dilanti Hues cu e tabatin plantacion di marihuana pero cu di e 136 matanan cu a haya, ta solamente 28 ta sirbi. Esaki ta di dos biaha cu A.M. ta presenta den Corte pa asunto di plantacion di marihuana. El a haya castigo combina.

PLANTACION DI MARIHUANA

Hues a mustra cu riba 28 December 2018, Polis durante pespues di persecusion di algun persona cu a horta y mira na cas di A.M. plantacion di marihuana.

A haci investigacion y a haya 136 mata. Hues a puntra A.M. pakico e tabatin plantacion di marihuana. Segun A.M. e plantacion tabata pa traha cannabis oil y e mes ta huma marihuana. Segun A.M., di e 136 matanan, ta solamente 28 cu Polis a haya den un seccion planta ta sirbi. El a bisa Hues cu e otronan no ta sirbi.

Hues cu potretnan di e plantacion den man, a bisa cu ta un plantacion grandi A.M. tabatin. Hues a bisa A.M. cu esey no por y cu na 2016 caba A.M. a haya condena caba pa plantacion di marihuana. El a haya 10 luna di prison di cual 6 luna ta condicional cu un tempo di prueba di 2 aña. Segun A.M. e tempo ey el a haya condena pasobra e tabatin un arma tambe. Hues a remarca cu ta net algun luna despues di cu A.M. su tempo di prueba a caba, el a bolbe cay sera pa plantacion di marihuana. Hues a bisa A.M. con mester haci cu e ta stop realmente cu plantacion di marihuana. Segun A.M. awor e tin un yiu y ta dedica na su yiu.

FISCAL

Fiscal a bisa cu e ta haya legalmente proba e plantacion di droga. El a bisa cu dia 28 December 2018, Polis pa casualidad a pasa banda cas di A.M. y a mira un plantacion. A resulta cu ta 136 mata di marihuana. E matanan a wordo confisca y destrui. Fiscal ta considera A.M. un residivista mirando cu den pasado caba el a haya condena pa marihuana. El a bisa Hues cu e ta tene cuenta cu for di e cellular di A.M. cu a investiga, por conclui cu A.M. tabata bende marihuana. Tin diferente mensahenan riba bendemento di marihuana. Fiscal a exigi 180 ora di trabou pa comunidad of 90 dia sera.

ABOGADO

Abogado mr. Yarzagaray a bisa Hues cu no ta promer biaha cu A.M. a cay pa droga. Sinembargo no ta asina cu e tabata bende. E abogado a bisa cu e asunto di marihuana den region tin hopi pais cu ta permiti marihuana pa medicinal. E abogado ta kere cu lo no dura mucho cu na Aruba tambe lo permiti marihuana pa uso medicinal. El a mustra cu segun A.M. ta 28 mata so tabata bon y e otronan no tabata sirbi. Teniendo esey na cuenta, e ta haya exigencia di Fiscal hopi halto si mira castigo cu ta duna na Hulanda. E abogado ta haya 15 pa 30 ora di trabou pa comunidad na su lugar. Fiscal a bisa cu e matanan a wordo destrui y e ta pidi pa keda confisca e botternan cu a haya cu simiya.

SENTENCIA

Hues a sera tratamento di e caso y a dicta sentencia di biaha. Hues ta haya legalmente proba cu A.M. tabatin plantacion di marihuana y ta haya cu lo ta bon pa duna A.M. un ultimo aviso. Hues a condena A.M. na 60 ora di trabou pa comunidad y si e no cumpli cu esaki e lo mester bay 30 dia sera. Tambe Hues a condena A.M. na 1 luna di prison condicional cu un tempo di prueba di 3 aña. Hues a sigui bisa cu e matanan ya ta destrui y e simiyanan ta keda confisca.

- Advertisement -

DUNA COMENTARIO

Please enter your comment!
Please enter your name here