Mediador di Gobierno Anselmo Pontilius:
*Un punto delicado cu mester renegocia!
ORANJESTAD (AAN) – Den entrevista cu DIARIO, Mediador di Gobierno Anselmo Pontilius, a comenta cu logicamente ora un negociacion pa un CAO cu un empresa ta tarda, e trahador ta keda pendiente riba e resultado y esaki den sentido di mehoracion di e condicionnan laboral, directo of indirecto, pa e trahador.
Pontilius, refiriendo na e caso di ABV (Sindicato di Hospital) el a expresa cu e no ta diferente, pero tin situacionnan no facil tanto pa e dunador di trabao como pa e trahadornan y e sindicato ABV.
E mediador a señala cu den e caso di Hospital ta un suma di placa tin disponible, cu for di adelanta e ta conoci, y cu ta limita. Tin cambionan cu mester wordo haci, por ehemplo den e fondo di pension cu ta hopi importante.
Den un reunion basta largo e siman aki, a ratifica cu tin un acuerdo entre Hospital cu e Sindicato, y un acuerdo di seguro di malesa cu ta data for di 2014 pero cu Hospital no a cumpli cune, manera a keda acorda y cu mester wak aworaki con pa resolve nan.
Anselmo Pontilius a agrega cu banda di esey tin otro puntonan cu ta importante. Cambionan cu, por ehemplo, Hospital ta proponiendo.
Por ehemplo tin un acuerdo cu ora e trahador yega 55 aña di edad, lo no traha cierto wardanan mas. Esey ta haci cu Hospital cu tin mil trahador ta confronta cu e situacion cu gradualmente, e hendenan cu lo no traha warda ta bira mas grandi, y esey ta afecta e operacion.
Den e sentido aki, tin proposicion di cambio cu no ta asina sin mas ta bay wordo introduci, pero tambe ta importante con esakinan ta wordo adapta y esaki a trece resistencia. Den e reunion aki e discusion tabata fuerte, Mediador Pontilius a comenta, indicando tambe cu tin tres punto cu mester sali for di nan.
Uno por ehemplo, cu ta e horario y si ta bay traha warda of no, no ta wordo resolvi cu solamente firma un acuerdo. Na opinion di e Mediador e ta un punto riba cual mester bay tin hopi combersacion no solamente cu e dirigentenan sindical, pero cu esnan cu ta envolvi, esta e trahador.
