Indexering lo suta trahadonan di Aruba

    919
    0
    SHARE
    - Advertisement -

    Mester reactiva economia cu Citgo a paralisa pa genera entrada

    *Comunidad no por paga aumento gastonan personal gobierno

    *Comercio no por carga mas gasto di personal den spiraal 

    ORANJESTAD   (AAN) — Mientras fin di siman tabata acerca, por a nota cu sindicatonan di trahadonan di gobierno tabata prepara nan miembronan pa accion contra gobierno pa asina forsa pago di Indexering. “Ta wordo lubida cu no ta gobernantenan ta paga indexering. E placa mester bini di saco di comercio y trahadonan cu no ta den servicio di gobierno, cu ta mayoria di trahado.”

    Kico ta bay pasa cu Aruba otro siman? Gobierno a invita trahadonan pa sinta na mesa, mientras e comision di supervision financiero di Reino lo ta na Aruba pa combersacionnan.

    E situacion di Aruba ta sumamente serio. DIARIO a papia cu diferente instancia cu a indica cu sindicalistanan ta na haltura di e situacion cu ta reina durante basta aña na Aruba.

    “Sindicalistanan ta hende cu a haya formacion pa nan por cumpli cu nan obligacion cu miembronan cu ta paga contribucion pa nan bienestar wordo sirbi. Den e forma cu sindicatonan kier forsa pago di indexering awe, un situacion sumamente serio ta wordo crea pa Aruba,” a wordo mustra.

    Indexering ta nifica cu ta bay aumenta salario di tur hende cu ta traha na gobierno. Unabes gobierno paga un trahado, e mester paga tur a base di igualdad di trato.

    Informantenan a indica cu placa di gobierno ta placa di pueblo y den e caso aki placa di trahadonan.

    “Ta increibel cu un sindicato por a sinta na mesa cu gobierno na 2017 y palabra cu ta haya placa di indexering awor mientras ya Reino tabata exigi Aruba baha su gastonan. Di unda e placa mester bini?” pregunta directo cu a wordo lansa.

    A wordo mustra na DIARIO cu no ta debe nacional y su interes desastroso so ta paga. Mester paga pa e buraco cu e fantasia di Citgo a crea.

    “Na 2016 gobierno a bay gasta placa sin limite basa riba e engaño di Citgo, cu no a bini. Comercio ni trahado a probecha di e crecemento cu 15 porciento cu gobierno anterior a anuncia. No tabata tin crecemento economico pero si mas peso pa Comercio, cu a tene trahadonan na trabou,”a wordo mustra.

    Sindicatonan di trahadonan di Gobierno mester tene cuenta cu ta e trahadonan di mas humilde di Aruba ta bay paga pa e indexering di e trahadonan di Gobierno cu no ta wordo paga door di saco di politiconan pero for di saco di pueblo.

    Trahadonan den gobierno y pafo di gobierno ta bay sinti e efecto. Tur trahado cu ta gana mas cu 2500 Florin mester paga belasting y nan hunto cu gobierno ta bay paga tur gasto di gobierno cu subi.

    “Loke ta pasa actualmente no ta husto pa comunidad,” a wordo mustra na DIARIO. E pais no por paga indexering sin crea un spiraal enorme, cu aumento di salario di tur ambtenaar cu tambe mester paga mas belasting mescos cu tur otro pagado di belasting di Aruba.

    Un situacion sumamente peligroso pa stabilidad por desaroya otro siman na Aruba si sindicatonan dicidi di actua pa mas placa prome cu pueblo haya un chens pa reemplasa Citgo, crea actividad economico nobo y un situacion financiero diferente na e caos cu mal gobernacion cu a sali liber, a laga atras.

    - Advertisement -

    DUNA COMENTARIO

    Please enter your comment!
    Please enter your name here