Indexering personal gobierno por bira inflacion explosivo

    393
    0
    SHARE
    - Advertisement -

    Resultado serio acuerdo cu gobierno Eman a cera cu Duana

    *E spiraal di aumento pago y prijs por bira explosion social

    *Aruba ta bira mucho mas caro pa sector turismo y inversion 

    ORANJESTAD  (AAN):  Cifranan di e Oficina Central di Estadistica di Aruba a duna prueba di e inflacion cu mal maneho di gobierno anterior a causa pa Aruba. E cifranan con prijsnan a subi riba base anual, por tin resultado sumamente serio pa pueblo.

    E Oficina Central di Estadistica di Aruba ta compila informacionnan pa e pais pero tambe pa entre otro inversionistanan.

    Inflacion ta nifica cu e loke un persona por cubri cu un suma di placa, ta baha. E resultado ta cu ora e persona mester haci pago, e aumento di prijsnan ta baha e balor di e placa cu e tin.

    Gastonan halto di compania ta haci cu nan mester subi nan prijs pa nan por sigui haci negoshi. Cu cada salario cu subi, cada gasto adicional pa un cas comercial, e prijs mester subi pa e negoshi no mester cera su porta.

    Pa pais Aruba e forma cu gastonan a subi a encera cu gobierno mester a subi su prijs, cu ta e placa cu pueblo ta paga na belasting. Resultado tabata cu tur prijs a subi na 2018 despues cu e gobernacion di Mike Eman a laga Aruba practicamente bankroet.

    Mientras gobierno a tuma medidanan di prome momento, mas medida mester wordo tuma den un situacion cu e hecho cu e proyecto Citgo a resulta di ta fantasma, a haci mas dificil pa Aruba sobrevivi.

    Ta den e situacion sumamente peligroso na 2017, gobierno Eman a sigui cu su strategia di tira problema pa solucion den futuro.  Esaki tabata base di e debe nacional, cu a aumenta pa uza placa cu no tabata tin.

    Den e acuerdo cu a cera cu personal di Duana, a trece dilanti cu awor lo paga e personal.

    E situacion real di Aruba a bini dilanti despues di eleccion 2017 cu ta comparabel cu e situacion na 2014 ora despues di eleccion 2013 a resulta cu Aruba tabata ya den problema serio cu a wordo scondi tras di Citgo.

    Na final di 2017 e gobierno nobo di Aruba no a haya di gobierno anterior cifranan pa 2018. Ademas Hulanda a exigi pa deshaci e fantasia di entrada cu Citgo lo a genera pa Aruba y cu gobierno Eman a inclui den su prome cifranan pa 2018.

    Na momento cu Gobierno di Aruba paga personal di Duana cu ta menasa di bay Hues, e mester aumenta salario di tur personal di gobierno di cual ya tin indicacion cu nan kier aumento di pago.

    Ora paga personal di gobierno lo mester aumenta medidanan pasobra Aruba no tin placa reserva pa esaki den e situacion cu e pais a keda.

    Esaki ta nifica cu atrobe comercio cu ya ta den problema mester paga mas medida pero no tin placa tampoco pa aumenta pago di su personal, cu tambe por bay exigi.

    Aruba ta enfrenta  momentonan sumamente dificil segun informantenan cu tin miedo pa un explosion social na entrada di e temporada nobo di turismo.

    “Indexering lo causa un spiraal espantoso. Comercio cu mester produci placa no tin. Ta for di 2014 comercio y sindicatonan ta conoci cu e problema serio di Aruba. Comercio a pidi atencion di gobierno for di 2014 pa baha su gasto,” informantenan a duna di conoce.

    DIARIO ta sigui vigila e situacion, cu por cay den un explosion social ora prijsnan sigui subi y menasa turismo y inversionistanan cu ta sumamente cauteloso cu gastonan sigur den e situacion mundial actual.

    - Advertisement -

    DUNA COMENTARIO

    Please enter your comment!
    Please enter your name here