No tin extension di fecha:
ORANJESTAD (AAN) – Ing. Haime Croes, director di Departamento di Infrastructura y Planificacion (DIP), den e cuadro di e ley di Ordenamento Teritorial di Aruba, a splica den entrevista cu DIARIO cu segun L.R.O (Landverordening Ruimtelijke Ontwikkeling) mester a emiti e asina yama ROP y djey emiti e ROPV.
Manera ta conoci e ROPV ta e optimalizacion di e ROP, cu ta mara den cada bestelling su uso (permisonan). Esey Ing. Croes a menciona.
El a splica cu esey a wordo poni caba pa dia 1 di October cu a pasa, y dia 1 di November proximo e ter inzage ta caba. Entre 1 di November pa 1 di December, Ing. Haime Croes ta spera cu esnan cu tin peticion pa vergunning acudi, masalmente, na DIP y entrega nan “zienswijze” (reaccion di interesado riba su peticion), riba loke DIP a presenta den su rapport di ROPV.
E ta spera cu hopi reaccion drenta DIP pa despues nan evalua esakinan. Croes a menciona cu ya caba, cuminzando dia 2 di December ta bay tin e “openbare hearing” riba e peticionnan cual lo bay di manera personal. Kiermen, esnan cu lo entrega nan esaki lo wordo splica den e openbare hearing, den e fechanan di 2 pa 8 di December.
E hearing lo tuma lugar den e cantina di DIP y nan lo wordo splica e aspectonan cu nan ta mira den e ROPV pa asina nan haya nan contesta y DIP por cera e capitulo y sigui pa e aprobacion di e ROPV.
No tin extension di fecha. Asina e ta para den ley, segun director di DIP.
