ORANJESTAD (AAN) – Awe, Dia 5 di October 2019, ta un dia hopi special pa famia Dania y pa hopi habitante di Dakota, pasobra un di nan baluartenan ta cumpliendo 100 aña di bida, danki Dios cu bon salud.
Señor Joe Dania ta un berdadero cabayero, galan, y elegante cu ta biba rondona di su yiunan, cu ta stime y cuide como e tesoro di mas grandi cu nan tin. E ta welo di mas of menos 20 nieto y ta un persona alegre.
Den entrevista cu Matutino DIARIO, sr. Joe Dania a haci un recorido breve rond di diferente etapa di su bida.
El a cuminza pa conta nos cu di chikito el a bay “Scol di Playa”. Asina nan tabata yame pasobra un scol so tabata tin na Oranjestad e tempo ey.
El a caba su scol basico y asina jong el a cuminza traha na Ecury Motors pa un par di luna, y despues Joe a drenta den Servicio Militar, na Savaneta Kamp.
“E experiencia aki tabata sublime. Na cuminzamento mi tabata un poco tristo, pero ‘bon bisa’! el a haci mi homber”, sr. Joe Dania a comenta.
El a keda na Savaneta Kamp como cuater aña y esaki a sosode den e temporada di e di dos Guera Mundial.
“Nos no tabata sa, nos a haya nos mes cu guera, y bo no ta prepara nunca pa guera. Nos tabata interno y varios militar di otro camindanan a bin yuda nos pa wanta esey, pero casonan fatal no tabata tin na Aruba, pero nos a yuda e barconan cu combustible”, sr. Joe Dania a relata.
Despues cu el a pasa su temporada na Savaneta Kamp, e hoben Joe a bay Hulanda cu vacacion.
“Mi a bay seis luna cu vacacion pero mi a bay pa siña drecha e meternan di awa. Despues ami hunto cu otro mucha homber a bay contrata na Alemania pa siña no solamente con pa drecha pero con pa traha tur e meternan di awa y e conocementonan aki mi a transporta pa Aruba”, el a conta nos.
WEB: Hefe di Meter Dienst:
Asina el a cuminza un carera di 40 aña trahando cu Gobierno na WEB Aruba NV, unda el a bira Hefe di Meter Dienst.
Sr. Joe Dania ta un persona cu ta hopi recorda y aprecia pa hopi ex-colega sea di su mes generacion y esnan cu a bin despues.
Prome piedra di Misa:
Sr. Dania ta e persona cu a pone e prome piedra pa e construccion di Misa Birgen di Fatima na Dakota. Semper el a keda un bon colaborado di e Misa, y el a haya reconocimento y bendicion di Monsignor Luis Secco. Tambe el a haya reconocimento di Misa como un bon y fiel sirbido.
Su famia, su gran amor:
Pa señor Dania berdaderamente e famia ta un gran pilar den su bida y su gran amor. Su matrimonio cu sra. Regina, a dura 55 aña pasobra su señora a fayece, y el a keda na encargo di su seis yiu: tres mucha muher y tres mucha homber.
Algo masha bunita mes ta cu sr. Dania nunca a kita su renchi di casamento. E ta conserve cune cu hopi orguyo, y cordando un nechi dama, comprensivo, y cu hunto cune a sa di a lanta un famia cu balor, principio, hopi respet, trahado responsable y hopi aprecia den e comunidad aki.
Aworaki tur su yiunan ta na Aruba, pero tabata tin un tempo cu tres a biba na Hulanda y tres a keda Aruba.
“Awo cu nan tur ta akinan mi ta alegre y contento pasobra mi tabata tin basta tempo sin wak tres di nan cu a biba hopi tempo na Hulanda. Ayera anochi (Diahuebs) tabata tin un fiesta pa nan”, sr. Joe Dania a comenta.
Un homber simple y ordena:
Papiando di su mes caracter, sr. Dania a expresa” “Mi ta un homber hopi simple, cu ta gusta orden y cu ta obedecido na tur hende, pasobra ni un ta mas cu otro.
Ami cu mi casa tabata streng manera tur mama y tur tata mester ta cu nan yiu, asina nos a lanta nos yiunan. Mi semper tabata bin cas di trabao, y prepara tur cos pa e siguiente dia”.
Pa sr. Dania tabata hopi duro ora el a perde su casa, pero el a acepta e boluntad di Dios y a keda cu su yiunan cu yudanza di e yiu mas grandi cu a zorg pa esnan mas chikito. “No pasobra mi casa a muri e famia a kibra. Mas nos a bin hunto, y aunke tres a bay biba na Hulanda y tres a keda Aruba e contacto semper tabata constante cu otro”.
Su yiunan ta: Ingrid y Modesto Desarela-Dania, Joseito (Ito) Dania, Gladys Dania, Rubia y Hubert Loopstok-Dania, Orlando y Marvis Dania, y Eugene y Valeria Dania.
Amor y humildad:
Kizas no ta existi un ingrediente specifico pa un matrimonio bira inseparable y feliz. Ta cuestion di suerte?
“Kico ta haci un matrimonio feliz? Wel, e suerte cu bo tin, no? Mi a topa un señora humilde, trahado, cariñoso, cu a sabi con pa conduci un matrimonio, cu a sabi di cria nos yiunan. Mi señora tabata masha streng cu nos yiunan, y a sa di lanta nan cu hopi educacion”, e cabayero a expresa. E tin un bunita recuerdo di su dia di casamento, cu ta un collage cu e mes a traha cu algun cuchara chikito di un regalo cu el a haya.
Celebracion:
Awe, famia Dania ta celebra e di 100 aña di Joe, cu un Santo Sacrificio di Misa pa 7 or di anochi, y claro na Misa Birgen di Fatima, y despues lo tin un brindis pa e famia, bisiña y conocidonan na su mes cas.
DIARIO ta felicita sr. Dania, cu Dios dune hopi aña mas di bida den union familiar y gozando di un excelente salud y inspirando su yiunan y tur hende cu conoce, cu su sonrisa alegre.
