Home Bites KLM keto bay ta famoso pa su servicio y comfort

KLM keto bay ta famoso pa su servicio y comfort

192
0
SHARE
- Advertisement -

ORANJESTAD (AAN): E prome avion Boeing 747 cu a ateriza na Aruba, tabata danki na KLM.  Ora cu esaki a yega den decada di 1970 na Aruba, trafico a paraliza a lo largo di Aeropuerto di pueblo cu kier a mira e avion aki.

Rutanan transatlantico cu KLM ta algo cu semper e pasahero di Aruba ta escoge ora di haci viahenan pa Europa.  Hasta viahenan pa Medio Oriente, y tambe Lejano Oriente, ta wordo haci prome via di Amsterdam.

KLM ta celebra awe Dialuna 7 di October, su di 100 aña di existencia.  Na luna di Juli cu a pasa, nan a haya e prome avion Dreamliner 787-10 cu a bin den color “Oranjebloesem”, cu tin e logo nobo di 100 aña.  E Boeing 787-10 aki tin 50 asiento mas cu e version anterior, y ta hopi friendly pa medio ambiente.

KLM sa cu nan a bira e prome aerolinea cu ta cumpli 100 aña cu e mesun nomber, y esaki ta bin debi na dos factor cu a hunga un papel fundamental den e logro aki.  Esta e combinacion autentico di clientenan fiel, y nan empleadonan fantastico.

CEO di KLM, Pieter Elbers a bisa recien cu nan ta balora nan cliente, y semper ta sigui cu inovacion y pesey nan ta pionero den sostenibilidad, y na KLM nan a crea un marca hopi stima y un bunita famia.  Den e centenario di KLM, nan ta orguyoso cu tin un futuro briyante, y nan ta cla pa e retonan excitante y oportunidadnan cu nan lo tin nan dilanti.

Cu e espirito y compromiso aki, e aerolinea Hulandes ta festehando na islanan ABC tambe e prome 100 aña di nan existencia, y tambe na tur ciudad unda nan ta viahando.

Bayendo den historia, e compania a wordo crea dia 7 October 1919 ora cu e fundadornan, un grupo di inversionista, a dune e nomber di “Royal Dutch Airlines for the Netherlands and Colonies”.  E prome vuelo di KLM tabata entre London y Amsterdam, y a tuma lugar dia 17 di Mei 1920, cu piloto Jerry Shaw abordo di un avion De Havilland DH-16 fabrica na Inglatera, y nan a transporta un grupo di periodista Britanico y un carga di corant.

Den nan prome aña, nan a transporta mas di 400 pasahero, y pesey e aerolinea a cumpra mas avion, e.o. Fokker F.II y tambe Fokker F.III y amplia ruta.

Na 1935 e compania a dicidi pone steward tambe den vuelo, y asina a pone nan bisti uniform cu e colornan di KLM.  Nan tabata wordo yama “mayordomo” e tempo ey.  Na aña 1959, Nel de Vries a bira e prome muher cu a cuminza traha como stewardess pa e aerolinea.

DIARIO ta desea KLM awe masha pabien, y sigur cu e avionnan blauw lo sigui bula pa Aruba pa hopi tempo mas.

- Advertisement -

DUNA COMENTARIO

Please enter your comment!
Please enter your name here